شال: سی ٹی ڈی بلوچ یکجھتی کمیٹی ءِ باسکانی ھواری ءَ آدگہ سیاسی گل ءُ پارٹیانی باسکاں رھوت کنگ ءُ وتی کارگس ءَ لوٹگءَ اِنت۔
بلوچ یکجھتی کمیٹی ءِ سروک بیبرگ ءَ ماں چاگردی رسانکدر ءِ تندجاہ ایکس ءَ نبشتگ کہ کاؤنٹر ٹیررزم ڈپارٹمنٹ بلوچ یکجھتی کمیٹی ءِ باسکانی ھواری ءَ آدگہ بازیں گلانی باسکاں رھوت کنگ بیھار دیگ ءُ گوں پجار کارڈ ءُ آدگہ کاگدانی ھواری ءَ سی ٹی ڈی ءِ کارگس ءَ پیش بوگ ءِ پرمان ءَ دیگ ءَ اِنت۔
بیبرگ ءَ گوشتگ کہ مردمانی رھوت کنگ ءُ کارگس ءَ لوٹائینگ ءِ مول آیانی ترسینگ اِنت، ایشی ما گوں ترندیں دانکاں ایر جن ایں، اگاں کسے زو ر بیگواہ کنگ بوت ایشی زمہ وار سی ٹی ڈی ءُ بلوچستان سرکار اِنت۔
یات بہ بہ اِت کہ گوستگیں روچ ءَ بلوچستان اسمبلی ءَ بلوچ یکجھتی کمیٹی ءِ بگیری ءَ پیپلز پارٹی ءِ استانی وزیر الی مدد جتک ءَ کرار داد پیش کرتگ اَت ءُ گوشتگ کہ بی وائی سی سلاہ بندیں گلانی رندگیری ءَ کنت۔
