شال: بلوچستان ءِ جتائیں ھند ءُ دمگاں انوگیں ترندیں ھیروپاں 13زھگاں ھوار 33 مردم بیران ءُ 15 مردم ٹپی بوتگ اَنت۔
سدانی کچ ءَ گس لمب اتگ اَنت ءُ شال کراچی شھدگ بازیں جاہ ءَ ھار ءَ مل اتگ۔ جتا جتائیں ھنداں ھورانی سوب ءَ موبائل پون ءُ دامگ بند بوتگ اَنت ءُ مردمانی کشار ھم تباہ بوتگ اَنت۔ انوگیں ھور ءُ ھیروپاں چہ جتائیں ھند ءُ دمگاں بیران بوتگیں مردمانی کچ 33 بوتگ۔
پی ڈی ایم ءِ رد ءَ چہ یک جولائی ءَ داں انوگیں ھوراں سیزدہ زھگاں ھوار 33 مردم بیران بوتگ اَنت۔ پانزہ مردم ٹپی بوتگ کہ آیانی تہ ءَیازدپ زھگ ھوار اِنت۔
آئی گوشگ اِنت کہ 558 گس سرجم ءَ تباہ بوتگ ءُ 13 ھزار 986 گس کمیں تاوان بوتگ اَنت۔ یک لک ، نو ھزار، نو سد ءُ سے مردم سانمند بوتگ اَنت۔
بلوچستان ءَ ھورانی سوب ءَ 58 ھزار، 799 ایکڑ ءِ کچ ءَ ڈگارانی کشار تباہ بوتگ اَنت۔ چہ ھور ءُ ھیروپاں 373 مال ءُ دلوت مرتگ اَنت۔ شھدگانی سر ءَ ھپت پھل تاوان بوتگ اَنت۔
