ھاران: زورگریں پاکستانی لشکر ءِ دست ءَ آوار جنگ بوتگیں شھزاد اھمد ء مھمبوب ملازھی ءِ یل نہ کنگ ءِ بگیری ءَ کھول ءِ نیمگ ءَ زھرشانی روانکے کشگ بوتگ۔
زھرشانی روانک چہ چیپ چاراہ ءَ درکپتگ جتائیں دگاں ترّ ءُ گرد اِش کرتگ۔ زھرشانی کنوکیں مردماں اکس ءُ پلے کارڈ دستاں بوتگ اَنت کہ آیاں زوریں بیگواھیانی بگیری ءَ اوگام جتگ۔
آیاں تران کرتگ ءُ گوشتگ کہ ھمے ماہ ءَ 17 اگست ءَ پاکستانی لشکر ءَ ورنائیں شھزاد اھمد آوار جتگ ءُ گوں وت برتگ، چنچو روچ ءِ گوزگ ءَ پد ھم آ دیم ءَ آرگ ءُ آجو کنگ نہ بوتگ۔
آیاں گوں دمگی واکدار ءُ وتگڑیں سرکار ءَ لوٹ کرتگ ءُ گوشتگ کہ شھرزاد اھمد ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔
آیاں گوشتگ کہ دو ھپتگ ءِ گوزگ ءَ پد ھم شھزاد اھمد ءِ باروا آئی کھول ءَ ھچ وڑیں سرپدی دیگ ءَ نہ اَنت۔ اگاں شھزاد اھمد یل کنگ نہ بو گڑا ما آئی کھول ءِ ھواری ءَ زھرشانی ءَ گیش کن ایں، پد ءَ ایشی زمہ واری دمگی واکدار ءُ سرکار ءِ سر ءَ بنت۔
