کراچی: 30 اگست زوریں بیگواھی ءِ سانمندیں مردمانی میان استمانی سالروچ ءِ درگت ءَ کراچی ءَ زھرشانی روانکے کشگ بوتگ۔ زھرشانی ءَ وائس پار مسنگ پرسنز آپ سند، بلوچ یکجھتی کمیٹی، بیگواھیں بلوچانی توار( وی بی ایم پی )، سند سجاگی پورم، ایچ آر سی پی ءُ آدگہ مردمی ھکانی گلانی سروکاں بھر زرتگ۔
زھرشانی روانک چہ تین تلوار ءَ درکپتگ ءُ کراچی پریس کلب ءِ دیم ءَ آسر بوتگ۔ زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت۔ آیاں زوریں بیگواھیانی بگیری ءَ اوگام جتگ۔
اے باروا سمی دین ءِ گوشگ اِنت کہ ریاستی ادارھانی سروکی ءَ زوریں بیگواھیانی بگیری ءَ چہ رسانکدر ءَ کمپین برجم دارگ ءَ ابید مرچی مردمی ھکانی میان استمانی روچ ءِ درگت ءَ پاکستان ءِ تہ ءَ آبادیں چہ جتائیں راجاں سیادی داورکیں مردم بلوچ، پشتون، سندی، سرائیکی ءُ اردو ءَ تران کنوکیں مردماں شریں وڑے ءَ بھر زرتگ۔
آئی ءَ گوشتگ کہ یک جیڑھے ءِ گیش ءُ گیوار کنگ ءَ ابید پہ پندل سازی ءَ زمینی راستیمٹ کنگ نہ بیت، بلکیں مردمانی دل ءَ گیش کینگ ود ایت ءُ ایشی بنیاد مھکم بیت۔
سمی دین ءَ گوشتگ کہ مرچی کراچی پریس کلب ءِ دیم ءَ جتائیں بھرگاں سیادی داروکیں مردماں بھر زرتگ ءُ اے ھمے گپ ءِ منانک اِنت کہ ریاستی پندلانی سر ءَ ھچ وڑ ءَ زانوگریں مردم دلجم نہ اَنت۔ بندیگیں مردمانی کشگ ءُ آیانی ژانگولیں لاشانی چگل دیگ ءَ اے دمگ ایمن نہ بیت ءُ اے چکاس گوستگیں دو دھک اِنت کہ بلوچستان ءَ برجاہ اِنت، ایشی آسر مئے ءُ شمئےدرسانی دیم ءَ اِنت۔
