شال: زور بیگواھیں آسپ ءُ رشید ءِ گھار سائرہ ءَ وتی شنگ کرتگیں تامربندے ءَ گوشتگ کہ31 اگست 2018 ءَ منی برات آسپ ءُ ناکوزتک رشید ءَ گوں آدگہ ھمبلانی ھمراھی ءَ زنگی ناوڑ نوشکے کہ بلوچستان ءِ نامداریں سوادجاھے چہ ھمود ءَ آوار جتگ ءُ بیگواہ کنگ بوتگ اَنت۔ یک ستمبر ءَ آیانی آزار داتگیں اکس رسانکدر ءَ شنگ کرتگ ءُ آیانی دزگیری ریاستی ادارھاں پدر کرتگ اَنت، بلے چہ ایشی پد شش سال اِنت ما نزان ایں مئے برات چون ءُ کج ءَ اَنت۔
آئی ءَ گوشتگ کہ کسان امری ءَ وتی لیب ءُ وانگ ءِ امر ءَ درس یل داتگ اَنت ءُ پہ وتی براتانی آجوئی ءَ بلوچستان ءَ ھوار اسلام آباد ءَ جتائیں زھرشانیاں بھر زرتگ بلے مئے گون ءَ انساپ نہ بوتگ۔ اسلام آباد ءِ آمیدگس بہ بیت یا بلوچستان ءِ آمیدگس، زھرشانی، کمیشن ءُ جی آئی ٹیز کج ءَ کہ مارا اوستے بوتگ ما پہ وتی براتانی بے میاری پیش کنگ ءَ شتگ ایں۔ بلے ھچ جاہ ءَ ما گوش دارگ نہ بوتگ ایں
سائرہ ءَ گوشتگ کہ اے شش سالانی میان ءَ پہ انساپ ءِ لوٹ ءَ منی سر ءَ گھگیری ءُ ناشرکاری ءِ ایپ آئی آر نبیسگ بوتگ۔ ما ترسینگ بوتگ ایں، سرپ گاڑیانی سر ءَ آتکگ ءُ کاگدانی سر ءَ موت نبشتگ ءُ مئے ترسینگ ءِ جھد کرتگ اِش بلے مارا انساپ نہ رستگ۔
آئی ءَ گوشتگ کہ اے شش سالانی میان ءَ چنچو ژانگولیں لاش دزکپتگ اَنت۔ زور بیگواھیں مردم دروگیں میڑانی نام ءَ کشگ بوتگ اَنت۔ چہ ایشی پہ براتاں مئے ترس گیش بوتگ۔ کجام وھد ءَ کہ زور بیگواھیں مردم دروگیں میڑاں کشگ بنت گڑا ما نادراھجاہ ءَ رویں کہ چوش مہ بیت منی برات نہ اَنت۔ چوش مہ بیت کہ منی برات ھمے وڑ ءَ دروگیں میڑاں جنگ مہ بنت۔ پہ انساپ ءَ ما ھر وڑیں جھد کرتگ بلے مارا انساپ نہ رستگ۔
سائرہ ءَ گوشتگ کہ 31 اگست ءَ منی براتانی زوریں بیگواھی ءَ شش سال سرجم بوگ ءَ اِنت من شال پریس کلب ءَ نیمروچ ءِ دو ءَ یک زھرشانی روانکے کش آں، من شال ءِ درسیں شرپمندیں مردمانی گون ءَ لوٹ کن آں کہ اے روانک ءَ ھوار بہ بنت۔ 31 اگست ءَ رسانکدر ءَ کمپینے برجم دارگ بیت بھر بزور اِت۔
