گوادر ءِ نوکیں دمگدار ( ڈی سی) بلوچ یکجھتی کمیٹی ءِ نیمگ ءَ برجاہ داشتگیں بلوچ راجی مچی ءَ بھر زرتگیں مردماں دلسیاہ کنگ ءَ اِنت۔
اھوالکار ءِ رد ءَ گْوادر ءِ نوکیں دمگدار ھمود الرھمان رانجھا ءَ بلوچ راجی مچی ءَ بھر زرتگیں مردماںی نام پورتھ شیڈول ءَ ھوار کرتگ اَنت۔ زوراکی ءِ آماچیں مردمانی تہ ءَ ھندی اھوالکار ءُ سیاسی ءُ چاگردی گل ءُ پارٹیانی کارکن ھوار اَنت۔
اھوالکارانی تہ ءَ ڈان نیوز ءُ انتھاب نیوز ءِ بھرام بلوچ، دی گْوادر پوسٹ ءِ شونکار جمیل کاسم، پسنی پریس کلب ءِ سرکماش ساجد نور ءُ پسنی ءِ اھوالکار راشد ھیدر ھم ھوار اَنت۔
یات بہ بہ اِت کہ گْوادر ءَ بلوچ راجی مچی بس پہ یک روچے 28 جولائی ءَ برجم دارگی اَت بلے چہ پاکستانی لشکر ءِ زوراکیانی سوب ءَ داں دہ روچاں پدی زر ءَ نندانک ءِ دروشم ءَ برجاہ بوت۔
بلوچ یکجھتی کمیٹی ءِ سروک ءُ سرکار ءِ میان ءَ گپ ءُ تران ءَ اے ھبر ھم مان کنگ بوتگ اَت کہ چہ زھرشانی نندانک ءِ ھلاسی ءَ پد ھندی مردم دلسیاہ کنگ مہ بنت۔ بلے سرکار وتی کول ءِ بگیری ءَ کنگ ءُ مردماں دلسیاہ کنگ ءَ اِنت۔
