بلوچی زبان ءِ نامداریں شائر ءُ نبشتہ کار آباد آسکانی ماں کراچی ءَ بیران بوتگ۔
نمیرانیں آبد آسکانی روکپتی بلوچستان ءِ دمگ سرباز اشکستگ ءِ جاہ منند اِنت۔ آئی ءَ بلوچی ءُ پارسی زبان ءَ بازیں کتاب نبس اتگ اَنت کہ آئی کتابانی تہ ءَ لچہ کاری ءُ ردانک شنگ بوتگ اَنت۔ چہ ایشاںابید کوھنیں شائری ءِ کتاب ھم ھوار اَنت۔
آبد آسکانی ءِ دہ دانگ دستونکانی کتاب شنگ بوتگ کہ پد ءَ یکجاہ کنگ بوتگ اَنت ” دستونکانی کلیات“ ءِ نام ءَ چاپ بوتگ۔
شش دانگ تنز ءُ گْوشکندانی کتاب اَنت کہ اے ھم پد ءَ کلیات ءِ دْروشم ءَ ”گْوشکندانی کلیات“ ءِ نام ءَ چاپ کتگ اَنت۔
نمیرانیں آبد آسکانی دگہ لھتے کتابانی نام،چشیں شوم ءُ شانزدہ ،چشیں نیک ءُ نیگبھت ،بے لِٹکیں بُراک، مسکیں میدان، سریمگیں بازار، دادشاہ ، کیچ ءِ چنال ، پکیر ءِ کچکول ، بلوچ بلوچی ءُ بلوچستان ، ماہ ءِ ایرگوری ءُ گُل سسا اِنت۔
نمیرانیں آبد آسکانی باروا گوشگ بیت لھتے وھد اِنت نادراہ بوتگ کہ کراچی ءَ آگا ھان نادراھجاہ ءَ درمان کنگ ءَ بوتگ اَنت مرچی بیران بوتگ۔ آبد آسکانی ھب چوکی ءَ گلزمین ءِ میار کنگ بیت۔
