بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وت شنگ کرتگیں درشانے ءَ گوشتگ کہ بی ایل اے ءِ نیمگ ءَ سرجمیں بلوچستان ءَ بندات بوتگیں آپریشن ھیروپ ءِ پارست ءَ دگ بندیانی میان ءَ داں انوں 62 کارمند کشتگ ءُ دو دزگیر کرتگ۔ اے جنگ بوتگیں لشکری کارمند گیشتر سادگ پوشاکیں بوتگ اَنت کہ مساپر بسانی سر ءَ وتی بنجلانی نیمگ ءَ روگ ءَ بوتگ اَنت۔ آیان ءَ پچارگ ءَ پد سرمچاراں کشتگ اَنت۔
آئی ءَ گوشتگ کہ سرجمیں بلوچستان ءَ بندات بوتگیں آپریشن ھیروپ ءِ پارست ءَ بی ایل اے مجید برگیڈ ءَ زورگریں لشکر ءِ بیلہ ءِ بنجل ءِ سر ءَ اُرش کرتگ ءُ داں انوں 24 کارمند کشتگ بنجل ءِ یک مزنیں بھرے اِش دستیگ کرتگ۔ وھدیکہ بی ایل اے پتہ اسکواڈ ءُ ایس ٹی او ایس یونٹاں سرجمیں بلوچستان ءَ شھدگ بستگ اَنت ءُ لشکر ءِ سر ءَ اُرشاں داں 62 کارمند اِش کشتگ۔
جارکش ءَ گوشتگ کہ اے دگ بندی گْوادر جیمڑی کوسٹل ھائی وے، ھوت آباد ءَ مند تربت شھدگ، تگران ءَ ابدوئی شھدگ، تربت، ھیرونک سی پیک دگ، شال تپتان شھدگ، نوشکے ھاران شھدگ، مستونگ کھڈ کوچگ شھدگ، کلات کراچی شھدگ، بولان ءُ کوہ سلیمان ءَ مزنیں شھدگ، بالگتر ءَ پَنجگُور شھدگ، سبی ءَ مھٹری شھدگ بند کرتگ اَنت۔
آئی ءَ گوشتگ کہ اے میان ءَ مند تُربَت شھدگ ءَ ھوت آباد ءَ دژمنیں لشکر ءِ یک کاروانے بلوچ سرمچاراں اُرش ءَ نشانگ کرتگ۔ ایشی آسر ءَ یک گاڑی یے سرجم ءَ تباہ بوتگ آئی سواریں پنچ کارمند مرتگ اَنت۔
جارکش ءَ گوشتگ کہ دگہ یک ارشے ءَ کلات ءِ گرائی ءَ بلوچ سرمچاراں ٹول پلازہ دستیگ کرتگ ءُ ساڑی ئیں کارمند دزگیر کرتگ اَنت۔ پہ آیانی یل کناھینگ ءَ آھوکیں دژمن ءِ کاروان ءِ سر ءَ پیسر ءَ سنگر گپتگ ءُ سرمچاراں اُرش کرتگ کم چہ کم پانزدہ کارمند کشتگ۔
آئی ءَ گوشتگ کہ بولان ءَ بلوچ سرمچاراں دگ بندی ءِ میان ءَ ایپ سی ءِ یک کاروانے ءِ سر ءَ اُرش کرتگ ءُ 16 ایپ سی کارمند کشتگ ءُ آیانی سلاہ دستیگ کرتگ اَنت۔ ھمے میان ءَ پنچ لیویز کارمند دزگیر کرتگ، بلے آیان ءَ بلوچ بوگ ءِ بنیاد ءَ کڈن کرتگ ءُ یل داتگ اَنت۔ ھمے میان ءَ چہ بولان ءَ گوزوکیں ریل ءِ پٹڑی گوں تراک ءَ تباہ کرتگ۔
جارکش ءَ گوشتگ کہ ھمے میان ءَ تُربَت شھر ءَ بی ایل اے ءِ سرمچاراں ترّ ءُ گرد برجاہ داشتگ ءُ ڈی بلوچ ءَ یک سرویلنس ڈرونے تیرگواری کرتگ ءُ دور داتگ۔
آئی ءَ گوشتگ کہ چہ ایشی ابید جتائیں ھنداں کم چہ کم بیست پولیس ءُ لیویز کارمند ءُ دو لشکری کارمند سرمچاراں دزگیر کرتگ اَنت آ انگت ءَ بی ایل اے ءِ بندیگ اَنت۔
جیھند ءَ گوشتگ کہ ھمے وڑ ءَ بی ایل اے ءِ مجید برگیڈ ءَ دژمنیں لشکر ءِ بیلہ بنجل ءِ یک بھرے داں پنچ ادار گوزگ ءَ پد ھم وتی دستیگی برجاہ داشتگ۔ ھمے میان ءَ داں انوں بیست ءُ چار دژمنیں کارمند کشتگ اَنت۔ آئی نوکیں ھال زوت رسانکدر ءَ شنگ بنت۔
