شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5554 روچ سرجم بوتگ۔ آدینگ ءِ روچ ءَ چہ بالگتر ءَ نیشنل پارٹی ءِ کارکن مھمد ایوب، ابداللہ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مئے مات ءُ گھار کمشرپ کنگ بوگ ءَ اَنت،پاکستان ءِ زوراکیانی بگیری ءَ ایمنیں جھد داں آھوکیں پدریچ ءَ سر بوگ ءَ اِنت۔ سرجمیں بلوچستان ءَ لشکرکشی گوں ترندی ءَ برجاہ اَنت۔ پاکستان ءِ نیمگ ءَ کوھانی تہ ءَ بمبگواری کنگ بوگ ءَ اِنت۔
آئی ءَ گوشتگ کہ زور بیگواھیں مردمانی کھول چہ سالاں پریس کلبانی دروازگاں ٹکگ ءَ اَنت، بلے اد ءَ درس گُنگ ءُ کور اَنت۔ زور بیگواھیں مردمانی چنچو سیاد ءُ آزیزاں ماں رسانکدر ءَ وتی پریاد شنگ کرتگ اَنت بلے آیانی گپ ءَ کے گوش دار ایت؟ ریاستی زوراکی وڑے نہ وڑے ءَ بلوچ ءُ اد ءِ جاہ منندانی سر ءَ برجاہ اِنت۔
ماما کدیر گوشتگ کہ ریاستی کشت ءُ کوش ءُ چگل دیگ ءِ شوندات ءَ کودکیں سیاسی کارکن، لبزانکار، شائر، وکیل، ڈاکٹر ءُ ھمک بھرگاں سیادی داروکیں مردمانی سر ءَ برجاہ اِنت۔ آیاں لشکر ءُ آئی جوڑ کرتگیں ادارہ آوار جنگ ءُ زوریں بیگواھی ءَ پد داں سالاں آزارجاھاں بند کنگ ءَ پد کوہ ءُ گیاباں چگل دیگ بنت۔ چنچو بر ءَ پنچ پنچ زور بیگواھیں مردمانی لاش پولیس ءَ دیستگ اَنت۔ آیانی کچ ھزارانی ھساب ءَ اَنت۔
