نوشکے: اوگانستان ءِ سیمسر ءَ پاکستانی لشکر ءُ اوگان لشکر ءِ میان ءَ میڑے بوتگ، ارش ءِ آسر ءَ پاکستانی لشکر ءِ یک سوبیدارے مرتگ۔
پاکستانی سرکار ءِ رد ءَ اے میڑ یک شمبے ءِ سھب ءَ بلوچستان ءِ بنجاھی شھر چہ شال ءَ دو سد کلو میٹر دور نوشکے ءِ نزیکیں ھند گزنلی ءَ بوتگ۔
انچوش گوشگ بوگ ءَ اِنت کہ اے میڑ ھما وھد ءَ بندات بوتگ کہ پاکستانی لشکر ءِ نوشکے ءِ 102 ونگ ءِ کارمند گزنلی پانگس ءَ ٹاور نمبر شش ءِ نزیک ءَ پاکستان ءِ نیمگ ءَ جنگ بوتگیں ٹٹ ءِ شر کنگ ءَ بوتگ اَنت کہ ھمے جاہ ءَ آیان ءَ ٹٹ ءِ پروشگ ءِ ھال رستگ۔
پاکستانی لشکر ٹٹ ءِ نزیک ءَ شتگ اَنت کہ چہ اوگان لشکر ءِ نیمگءَ تیرگواری بندات کنگ بوتگ، چہ تیرگواری ءَ سوبیدار تارک اکبال ٹپی بوتگ۔ پاکستانی لشکر ءَ پسھی تیرگواری کرتگ کہ اے میڑ داں ادارے ءَ برجاہ بوتگ۔
ٹپی بوتگیں پاکستانی لشکر ءِ سوبیدار تارک ٹپانی درد نہ سگ اِتگ اَنت ءُ مرتگ۔ آئی لاش جند ءِ ھند ھیبرپکتوانواہ ءِ دمگ لکی مروت ءَ دیم دیگ بوتگ۔
