چہ کیچ ءَ 8 ، آواران ءَ 7 ، کزدار ءَ 6 ، مستونگ ءَ 2 ، شال ءَ 13 ، ھاران ءَ 5 ، گوادر ءَ 3 ءُ چہ کراچی ءَ 5 بلوچ شھرمنند زور بیگواہ ءُ ناراھی دزگیر کنگ بیتگ۔
پانک ءِ ماھی گزارش ءِ رد ءَ جولائی ءِ ماہ ءَ ماں بلوچستان ءَ پاکستانی تواناں 3 کس ناراھی کشتگ ءُ 35 زور بیگواہ کرتگ۔
بلوچ راجی زْرمبشت ( بی این ایم ) ءِ مردمی اگبالانی تْرامگیج ءَ وتی گزارش شنگ کرتگ۔بی این ایم ءِ تْرامگیج ’ پانک ‘ ھمک ماپ بلوچستان ءَ مردمی اگبالانی جاور ءِ سر ءَ انگریزی ءُ اردو زبان ءَ گزارش شنگ کنت۔ ایشی ءِ تہ ءَ زور بیگواہ ءُ سانمند بیتگیں مردمانی سرجمیں نام ءُ نشان ھوار اَنت۔
جولائی ءِ گزارش ءِ رد ءَ 35 زور بیگواھیں مردماں ابید لھتے دگہ ناراھی دزگیر کنگ بیتگ۔ چہ کیچ ءَ 8 ، چہ آواران ءَ 7 ، چہ کزدار ءَ 6 ، چہ مستونگ ءَ 2 ، چہ شال ءَ 13 ، چہ ھاران ءَ 5 ، چہ گوادر ءَ 3 ءُ چہ کراچی ءَ 5 بلوچ شھرمنند زور بیگواہ ءُ ناراھی دزگیر کنگ بیتگ اَنت۔
بلوچستان ءَ زور بیگواھیں مردمانی کھولانی زھرشانیانی سر ءَ مھترھندی توانانی بیڑ ءُ مردمانی آزار دیگ ھمروچیگیں کارے۔ پانک ءِ گزار ش ءَ اے جاور ءِ سر ءَ بے تاھیری درشان کنگ ءُ گْوشگ بیتگ کہ 28 جون 2024 ءَ پولیس ءِ ناشرکاری ءِ گر ءُ دار ءِ تْرامگیج ( سی ٹی ڈی ) ءَ زھیر نامیں مردمے دزگیر کنگ ءَ پد زور بیگواہ کرتگ ھمیشی ءِ پد ءَ آئی ءِ کھول ءِ مردماں سریاب دگ شال ءَ زھرشانی نندانک کرتگ۔ پرایمنیں زھرشانی کنوکانی گوش دارگ ءُ جیڑہ ءِ گیشینگ ءِ جاہ ءَ آ لٹ دیگ ءُ دزگیر کنگ بیتگ اَنت۔
پانک ءَ چہ ایشی ءَ ابید تربت ءَ زور بیگواھیں مردمانی کھول ءِ زھرشانی ءِ نیمگ ءَ ھم دلگوش پریتگ کہ آ اود ءَ 48 ءَ بہ گر داں 45 ڈگری سیلیسئس گرم ءِ تہ ءَ ھم مردم زھرشانی ءَ نشتگ اَنت ءُ زھرشانی اش دنیگت برجاہ اِنت بلے سرکار آیاں یکشل ءَ ڈالچار کنگ ءَ اِنت۔ کزدار ءِ ھند نال ءِ کوچگ ’ کوچہ ‘ انگر کنگ ءُ ارش کنگ بیتگ، جنین لٹ دیگ ءُ ٹپی کنگ بیتگ اَنت ءُ شش کس زور بیگواہ کنگ بیتگ۔ کھولاں ھمے ناراھیانی سر ءَ سی پیک ایم ھشت ءِ ھمگرنچیں دگ بستگ ءُ نندانک کرتگ۔ تْرامکاراں دزگیریں مردمانی یلہ کنگ ءِ زبان داتگ بلے نہ موک اتگ ۔
پانک ءِ گزارش ءِ تہ ءَ چہ جھان ءِ دلگوش گروکیں بلوچ راجی مچی ءِ سر ءَ مھترھندی زوراکیانی بارہ ءَ ھم گپ جنگ بیتگ۔ پانک ءِ گزارش ءِ رد ءَ 28 جولائی 2024 ءَ بلوچ یکجھتی پتر ءَ بلوچستان ءَ مردمی اگبالانی بگیری ، زور بیگواھی ءُ درآمیدگسی کوشانی بگیری ءَ ماں گوادر ءَ مچی یے برجم داشتگ۔ پرایمنیں مچی سرکار ءَ گوں زور داشتگ۔مستونگ ، ھب ءُ تربت ءَ مچی ءَ سرگپتگیں مردم لٹ دیگ بیتگ اَنت۔ راجی مچی ءِ بھرزیروکانی مچی ءِ روگ ءَ دارگ ءِ سر ءَ سرجمیں بلوچستان ءَ زھرشانی بیتگ۔زھرشانی کنوکانی سر ءَ وت سر ءُ ناپکاریں زور ءِ کارمرد کنگ ءَ مستونگ ءَ 14 زھرشانی کنوک ٹپی بیتگ چہ آیاں یکے ابدل متیب ءِ سر سکا پرشتگ ءُ چہ ایشی ءَ آئی ءِ جاور ناگیگ اِنت۔ تربت ءَ پاکستانی توانانی لٹ ، تیر ءُ ارس ریچیں گیساں 25 کس ٹپی ءُ ازگر نامیں مردمے بیران بیتگ۔گوادر ءِ جاور چد ءُ بدتر بیتگ اَنت کہ آ اود ءَ راجی مچی ءِ بھرزیروکانی سر ءَ ایپ سی ، سی ٹی ڈی پولیس ءُ چیریں واکاں ارس ریچیں گیس جتگ ، تیر گواری کرتگ ءُ مردم لٹ شاپ کرتگ اَنت، چہ اے کار پداں ورنایے بیران ءُ باز ٹپی بیتگ۔
پانک ءَ وتی لوٹ دمپار اتگ ءُ گْوشتگ جولائی ءِ ماہ ءَ ھم بلوچستان ءَ مردمی جاور ناگیگ بیتگ اَنت۔ بلوچستان ءَ پاکستانی تواناں ناں ایوک ءَ وتی آئین بلکیں میان استمانی مردمی اگبالانی بارہ ءَ راھبند ھم لگتمال کرتگ اَنت۔ اے جاوراں پہ بلوچ راج ءِ بنکی اگبالانی پھریزگ ءَ زیتیں میان استمانی دزمانجنی ءُ پاکستان ءِ گر ءُ دار المی اِنت۔
