بلوچ یکجھتی کمیٹی ءِ جارکش ءَ گوشتگ کہ زی مستونگ ءَ تربت ءِ جاہ منندیں ورنا ءُ پنجگور ءِ دمگدار، زاکر ءُ آواران ءَ کودکیں زھگ ستارا شبیر ءِ کوش ءَ ایر جن ایں۔ زاکر ءُ ستارا شبیر ءِ کوش بلوچستان ءَ برجاھیں کشت ءُ ھون ءِ درچ اِنت کہ چہ گوستگیں ھپت دھکاں برجاہ اِنت۔ ءُ ایشی تچکی ءَ ھما توانمند ھوار اَنت کہ آ ھمک روچ بلوچ ورنایانی ژانگولیں لاشانی چگل دیگ ءَ بگر داں دروگیں میڑاں کشگ ءَ اَنت۔
آئی ءَ گوشتگ کہ بلوچستان ءَ اے ناھکی ءُ زوراکی ءِ سوب ءَ ھمک روچ چہ کوہ سلیمان بگر داں مکران ءَ ھمک گس پرسیگ اِنت۔ انوں گوستگیں ھپتگ ءَ بلوچ راجی مچی ءَ شھید بوتگیں سے ورنایانی ھون ھشک نہ بوتگ اَنت کہ زی کودکیں ستارہ شبیر ءُ ورنا زاکر ءِ لاش آتکگ۔
آئی ءَ گوشتگ کہ اے وھد ءَ بلوچستان چہ یک مردمی ویلے ءَ گوزگ ءَ اِنت ءُ بلوچ راج سرجم ءَ بلوچ چکچینی ءِ دیم پہ دیمی ءَ کنگ ءَ اِنت۔ بلوچ یکجھتی کمیٹی مردمی ھکانی گلانی گون ءَ لوٹ کنت کہ پہ چکچینی ءِ دارگ ءُ لکانی کچ ءَ مردمانی زندگی ءِ پھریزگ ءَ زوت کرد ءَ پیلو بہ کنت۔
