بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں شمبے دہ اگست ءِ بیگاہ ءِ پنچ ءَ ھاران ءِ ھند لتاڑ ءُ شیروزھی ءِ میانجی ءَ برجاھیں دژمنیں پاکستانی لشکر ءِ پانگس ءِ سر ءَ گوں راکٹاں اُرش کُرتگ، اُرش ءَ لشکر ءَ جانی ءُ مالی تاوان بیتگ۔
آئی ءَ گوشتگ کہ بی ایل ایپ اُرش ءِ زمہ واری ءَ منّ ایت ءُ چہ راج ءَ دزبندی کنت کہ آ دژمن ءِ وتگڑیں چاردہ اگست ءِ مرگشاں وت ءَ گستا بہ دار ایت، بلوچستان یک زورگِپتیں ڈیھے کہ پاکستان ءَ پہ زور گِپتگ، پمشکا دژمن ءَ اِد ءَ وتی وتگڑیں آجوئی ءِ مراگشانی برجم دارگ ءِ موکل نیست ءُ نہ کہ موکل دیگ بیت کہ دژمن ءُ آئی ءِ ھندی چریک وتی وتگڑیں آجوئی ءِ مرگشاں برجم بہ دار اَنت۔چوشیں مراگش سرمچارانی نشانگ ءَ اَنت۔
جارکش ءَ گوشتگ کہ بلوچ سرمچار ءُ بلوچ راجی آجوئی زْرمبشت ءَ مھکم کنگ ءَ اِنت ءُ بلوچ راج ءِ کمک گون اِنت، کہ زْرمبشت ءَ مھکم کنگ ءَ اِنت ءُ ھرچ باسمائیں بلوچ زورگریں پاکستان ءِ وتگڑیں آجوئی ءِ روچ ءَ نہ منّ ایت ءُ آئی ءِ مراگشاں بھر نہ زور ایت بلے زورگریں پاکستانی لشکر بلوچستان ءِ جتائیں دمگاں پہ زور مردماں چہ گِساں در کنت ءُ چاردہ اگست ءِ مراگشاں بارت آیاں پہ وتی مراگشانی سوبمند کنگ ءَ کارمرد کنت داں کہ چہ سرمچارانی اُرشاں وت ءَ بہ پھریز ایت۔ مردمان ءَ پہ وتی دیمپان کنگ ءَ کارمرد کنگ پاکستانی لشکر ءِ سرمچارانی دیم ءَ پروش ءَ پدر کنت۔
