بلوچ راجی زرمبشت ( بی این ایم ) ءِ جارکش ءَ گوشتگ کہ بلوچستان ءِ جتائیں ھنداں مردم ڈگارانی دستیگ کنگ زوگری شوربندی ءُچہ ریاستی زورگپتی ءَ دو دیمیں زوراکی ءِ آماچ اَنت۔ یک نیمگے ءَ زورگریں سی پیک ءِ پارست ءَ جوڑ بیوکیں ایم 8 لنک دگ مردمانی آبادی ءُ آبادیں ڈگارانی سر ءَ گوزگ ءَ اِنت ءُ دومی نیمگ ءَ ریاست ءِ پلہ مرزیں وتگڑیں سردار ءُ مھتر مردمانی ڈگاراں دستیگ کنگ ءَ اَنت۔ چہ ایشی نہ تیوک ءَ مردمانی زرگپتیں ڈگار سانمند بوگ ءَ اَنت، بلکیں ھورانی آپ ءِ گرز راہ اَنت۔ ڈگارانی ملوکیں کور ءُ شیپ ءُ ھورانی ھاراں راہ پرشت ءُ پروش کرتگ اَنت۔ چہ ایشی نمبگیں نزام ءِ آپ بند تباہ بوتگ اَنت۔
آئی ءَ گوشتگ کہ دومی نیمگ ءَ بلوچستان تیوک ءَ آواران ءِ مردمانی پت ءُ پیروکی ڈگارانی سر ءَ لشکر ءِ کمکار کشندہ ٹولی ءُ وتگڑیں سردار ءُ مھترانی پارست ءَ دستیگ کنگ بوگ ءَ اَنت۔ کشندہ ٹولی ءِ سروک ءُ سردار مردمانی ڈگاراں دستیگ کنگ ءُ سرکار ءِ کمک ءَآیاں دری یا وتی دلدوستیں مردمانی کر ءَ بھا کنگ ءَ اَنت۔ بزاں اے ڈگار مردمانی پت ءُ پیروکی میراس ءُ آیانی زورگار ءِ بنیادی بنشون اَنت۔ پاکستانی لشکر پہ چاگرد ءِ سند ءُ سیل ءَ جتائیں پندل چکاسگ ءَ اَنت دانکہ مردم انچیں جیڑھانی تہ ءَ مانگیش اَنت ءُ وت ءَ وت جیگ ماں جیگ بہ بنت۔
آئی ءَ گوشتگ کہ چہ پاکستانی نزام ءَ بے اوستیں مردمان ءَ بلوچ راجی زرمبشت ( بی این ایم ) ءِ ” مصالحتی کمیٹی” ءَ داں انوں ھزارانی کچ ءَ کیسانی سلاہ کرتگ، آیان ءَ ٹولیاں پہ رزا من اتگ اَنت، بلے نوں چاگرد ءِ تہ ءَ سند ءُ سیل ودی کنگ ءُ پہ مردمانی مچی سزا دیگ ءَ آدگہ پندلانی ھواری ءَ ڈگارانی دستیگ کنگ ءِ کار تیز کنگ بوگ ءَ اِنت۔
جارکش ءَ وتی درشان ءِ گڈی ءَ گوشتگ کہ اے وڑیں ناشرکار پہ ڈگارانی لب ءَ ریاستی شونداتانی پلہ مرزی کنگ ءُ چاگرد ء تہءَ ٹولی بازی ءُ میڑگ ءِ کار ءَ یل بہ کن اَنت، اگاں نہ راج ایشانی جست ءَ کنت۔
