تربت: زی بلوچ یکجھتی کمیٹی ءِ نیمگ ءَ نندانک جاہ ءَ ” بلوچ راجی مچی ءِ سر ءَ ریاستی زوراکی ءُ انوگیں جاور” بنگپ ءِ سر ءَ دیوانے برجم دارگ بوتگ۔ دیوان ءَ سیاسی، چاگردی، لبزانکی کارکن ءُ جتائیں بھرگاں سیادی داروکیں مردماں بھر زرتگ ءُ وتی ھیال درشان کرتگ اَنت۔
دیوان گوں بلوچ راجی سوت ءَ بنگیج کنگ بوتگ کہ مردم پہ راجی سوت ءِ شرپ ءَ اوشتاتگ اَنت۔
تران کنوکاں مردمی ھکانی برجاھیں بگیری ءُ بلوچانی گون ءَ ریاست ءِ ناشریں رویشتانی باروا گپ جتگ ءُ گوشتگ کہ ما ریاست ءِ زوراکیں کارپداں ایر جن ایں ءُ میان استمان ءَ پہ دلگوش گور کنگ ءَ زور دے ایں۔
آیاں گوشتگ کہ بلوچ یکجھتی کمیٹی ءِ نیمگ ءَ بیوکیں راجی مچی یک سیاسی کارے کہ سرکار ءَ آئی دیم ءِ دارگ ءِ جھد کرتگ۔ اگاں ریاست ءَ بلوچ راجی مچی ءَ سر ءَ ارش مہ کرتگیں گڑا اے جاور ودی نہ بوت اَنت ءُ گوادر ءَ ھوار، تربت، پنجگور، نوشکے، مستونگ ءُ شال ءَ اے زھرشانی نندانک برجاہ نہ بوت اَنت۔
آیاں گوشتگ کہ دزگیر بوتگیں مردم زوتاں چہ زوت یل کنگ بہ بنت ءُ ریاست برجاھیں زھرشانی نندانک ءِ لوٹا پیلو بہ کنت، بلوچانی بگیری ءَ وتی زوراکیاں ھلاس بہ کنت۔
