بلوچ یکجھتی کمیٹی ءِ جارکش ءَماں رسانکدر ءَ وتی شنگ کرتگیں درشانے ءَ گوشتگ کہ بلوچ یکجھتی کمیٹی ءِ بلوچ راجی مچی ءِ سر ءَ ریاستی زوراکی ءُ رستریانی بگیری ءَ مرچی نو روچ اِنت کہ گوار ءَ زھرشانی نندانک برجاہ اِنت۔
آئی ءَ گوشتگ کہ بلوچاں درسیں جنجال ءُ ریاستی زوراکیاں ابید گوں ھمت ءُ توکل ءَ زھرشانی نندانک برجاہ داشتگ۔ بلوچ راجی مچی ءِ سوبمندی بلوچستان ءِ مردمانی گھگیری ءَگامے دیم ءَ برتگ، بلے ما سرپد بہ بہ ایں کہ اے یک دراجکش ءُ گرانیں جھدے ایشی مھکم توکل ءُ مزن زانتیں مردم ھم اے جھد ءِ داں سوبمندی ءَ کمک ءَ کن اَنت۔ بلوچ ءُ بلوچ یکجھتی کمیٹی ءِ کارکناں دلگوش دے ایں کہ اے دراجکش ءُ اوپار کنوکیں جھد ءَ وت ءَ سسائی ءُ لیکھی بنیاد ءَ چاڑکہ بوگ مئے بیادی لوٹ اِنت ءُ ھمے مئے سوبمندی ءِ مانزمان اِنت۔
آئی ءَ گوشتگ کہ پہ بلوچ راجی مچی ءِ بے سوب کنگ ءَ ریاست ءَ ناشری ءُ رستری ءِ گنتریں درورے برجاہ داشتگ۔ بلے ریاست ءِ زور ءِ دیم ءَ بلوچانی توکل ءُ ھمت ءَ ھما درور برجاہ داشتگ کہ چہ ایشی ریاست ءُ آئی درسیں ادارہ ھمے گپ ءَ سرپد بوتگ اَنت کہ مردمانی زور ھم مزنیں توانے۔ مردمانی زور ءِ دیم ءَ ریاست ءِ زور تیوک ءَھاک ءِ جمپ ءِ وڑ ءَ اِنت۔
آئی ءَ گوشتگ کہ بلوچ راجی مچی گوادر ءَ بنجاھی نندانک ءَ ابید اے وھد ءَ شال، پنجگور، تربت ءُ نوشکے ءَ برجاہ اَنت۔
