ھاران: سیاہ پٹ ءَ زورگریں پاکستانی لشکر ءَ سَے مردم آوار جتگ ءُ بیگواہ کرتگ کھول ءَ زھرشانی ءَ شھدگ بند کرتگ۔
اھوالکار ءِ رد ءَ زورگریں پاکستانی لشکر ءُ چیریں ادارہ ءِ کارمنداں چہ دہ سال ءَ پیش زوربیگواہ کنگ بوتگیں ابدلکریم میروانی گس ءَ بیڑ برتگ ءُ زوراکی کرتگ ءُ سے مردم آوار جتگ، آیانی تہ ءَ ابدُالشکور میروانی ء ھاجی ابدُرزاک ءُ ابدُاللہ میروانی ء ھاجی ابدُرزاک پجارگ بوتگ اَنت سیمی مردم انگت پجارگ نہ بوتگ۔
زور بیگواھیں ابدُالکریم ءِ برات ابدُالکدوس ءَ گوشتگ کہ پاکستانی لشکر ءُ چیریں ادارہ ءِ کارمنداں دوشی شپ ءَ مرچی سھب ءَ دو رنداں منی گس ءَ بیڑ برتگ ءُ جنینانی سر ءَ زوراکی کرتگ ءُ گس ءِ سامان پروشتگ اَنت ءُ منی برات ءَ ھوار دگہ دو سیاد آوار جتگ ءُ بیگواہ کرتگ اَنت۔ مئے کھول ءَ پہ وتی مردمانی آجوئی ءَ چہ ھاران ءَ شال ءَ روکیں شھدگ بند کرتگ۔
آئی ءَ گوشتگ کہ من چہ ھاران ءِ مھلوک ءَ لوٹ کناں کہ آ بیا اَنت مئے زھرشانی ءَ ھوار بہ بنت ءُ پہ مئے مردمانی آجوئی ءَ توار چست بہ کن اَنت۔
