بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ پاکستان ریاست بلوچ راجی مچی ءِ بگیری ءَ زور ءُ آزار ءِ کارمرز کنگ ءَ پد بلوچ راجی مچی ءِ میان ءَ دزگیر بوتگیں ءُ زور بیگواھیں مردمانی کھولاں بلوچ راجی مچی ءِ بگیری ءَ پہ پریس کانپریس کنگ ءَ بیھار دیگ ءَ اَنت۔
آئی ءَ گوشتگ کہ ریاستی چیریں ادارہ ءُ کشندہ ٹولی شال، سریاب، کلی اسماھیل ءُ ھدا ءَ بلوچ راجی مچی ءِ میان ءَ دزگیر ءُ زور بیگواھیں مردمانی کھولانی بیھار دیگ بندات کرتگ۔ ھمے کھولاں لاچار کنگ ءَ اَنت کہ آ پریس کانپریس بہ کن اَنت ءُ بلوچ یکجھتی کمیٹی ءُ بلوچ راجی مچی ءَ ایر بہ جن اَنت۔ ریاستی ادارہ ھمے کھولاں بیھار دیگ ءَ اَنت کہ اگاں اے کھول کمک نہ کن اَنت گڑا آیانی ازیز یل کنگ نہ بنت ءُ تاوان دیگ بنت۔
آئی ءَ گوشتگ کہ اے کھولانی مردماں پہ زور کارمرز کنگ اے زوراکیں شوربندی مردمی ھکانی گنتریں بگیری اِنت ءُھمے پدر کنت کہ ریاست ایرادگری ءِ پہ بے توارکنگ ءَ داں کجام ھد ءَ روگ ءَ چاڑکہ اِنت۔ ما پاکستان ریاست ءَ تچکی ءَ گوشگ لوٹ ایں کہ چہ اے ھیلھا بلوچ راج ءَ بے توار کرتگ نہ کن ئے۔ ما چہ وتی ایمنیں جھد ءَ راستی ءِ سر ءَاوشت ایں۔
