بلوچ راجی زْرمبشت (بی این ایم) ءِ بنجاھی جارکش ءَ گْوشتگ کہ نیدرلینڈ تَک ءِ سیمی کونسل ءِ دیوان مھیم ابد رھمان ءِ سروکی ءَ شھید پِدا اھمد ءِ یات ءَ برجم دارگ بیتگ۔ دیوان ءِ گچینی مھمان بی این ایم ءِ سرکماش ڈاکٹر نسیم ءُ ھاجی نسیر، ابدُلگنی، ابدُلواھد بیتگ، دیوان ءِ جارچین کھور بیتگ۔
دیوان بلوچستان ءِ شھیدانی یات ءَ دو دمان ءِ بےتواری ءُ شھید ستک شانی ندر کنگ بیتگ۔پد ءَ بلوچی زبان ءِ گشندہ بکشی بلوچ ءُ آبد بلوچ ءَ راجی سوت ونتگ۔ دیوان ءَ نیدرلینڈ تک ءِ دو سال ءِ کارکِرد ءُ مالی رپورٹ پیش کنگ بیتگ۔ دو سال ءِ رپورٹ ءَ پد جُست ءُ پسو ءُ کارانی بابت ءَ نگدی تران کنگ بیتگ۔
آئی ءَ گْوشتگ کہ آرگنائزنگ باڈی ءِ وھد ھلاس بیتگ ءُ پہ نوکیں کابینہ ءِ گچینکاری ءَ ھاجی نسیر ءِ سروکی ءَ ڈاکٹر لتیپ ءُ نبیل ءِ ھواری ءَ پترے جوڑ کنگ بیتگ۔ بازیں باسکاں گچینکاری ءَ بھر زُرتگ ءُ جتائیں اُگدھانی سر ءَ اُگدھدار گچین کُرتگ اَنت۔
گچینکاری ءَ نیدرلینڈز تَک ءِ سرکماشی ءَ مھیم ابدرھمان، کمک کارگشادی اگدہ ءِ سر ءَ آلیہ بلوچ، ھزانچی ءِ اگدہ ءِ سر ءَ بھار بلوچ ابید گچینکاری ءَ گچین کنگ بیتگ ءُ پہ کارگشاد ءُ کمک سرکماش ءِ اُگدہ ءِ سر ءَ گچینکاری بیتگ کہ دیدگ بلوچ کارگشاد ءُ وھید بلوچ کمک سرکماش گچین کنگ بیتگ۔
دیوان ءِ گُڈی ءَ بلوچ راجی زْرمبشت (بی این ایم) ءِ سرکماش ڈاکٹر نسیم ءَ نوک گچین بیتگیں کابینہ ءِ اُگدھدار مراد باتی داتگ اَنت ءُ گْوشتگ کہ مئے جُھد نوک نہ اِنت۔ اے جُھد چہ ھما روچ ءَ برجاہ اِنت کہ پاکستان ءَ بلوچستان دستیگ کُرتگ۔ مئے گْوستانک چہ دیمونیاں سریچ اِنت۔ شھید پِدا اھمد ءُ آدگہ گرابھائیں سروکاں وتی جان ندر کُرتگ اَنت ءُ اے جُھد ءَ نوکیں ارواھے بکش اِتگ۔ مرچی مارا ھمایانی کشک رستگیں راہ ءِ راھی بیگ ءُ راجی زْرمبشت گیش مُھکم کنگی اِنت ءُ مارا کول کنگی اِنت کہ ما ھچ وڑ ءَ چہ وتی سیت بلوچستان ءِ آجوئی ءَ پش کِنز نہ بہ ایں۔ بی این ایم ڈائسپورا ءِ اولی کِرد جھان ءَ اے کلوہ ءِ سر کنگ اِنت کہ بلوچ پہ وتی سرڈگار ءِ آجوئی ءِ زْرمبشت میان استمان ءِ راھبندانی رِد ءَ ھلائینگ ءَ اِنت ءُ بلوچ ھچ پیم ءَ پاکستان ءِ ایردستی ءَ نہ منّ ایت۔
دیمتر ءَ ڈاکٹرنسیم ءَ گْوشتگ کہ بلوچ راجی زْرمبشت ءِ لپاشگ ءَ زور،زوراکی ءُ بےکچ ءَ بلوچ ءِ چُکچینی کُرتگ بلے چہ ایشی ءَ ابید بلوچ راجی مارشت گیش مُھکم، ورنا ءُ باسما کنگی اِنت۔ھمے مھکمی، مارشت ءُ باسمائی بلوچ راجی آجوئی ءِ مانزمان جوڑ بیت۔ گُڈی ءَ بی این ایم ءِ سرکماش ءَ دُرسیں باسکانی منت گِپتگ ءُ گْوشتگ کہ شُما اِد ءَ اَتک ءُ بلوچ راجی زْرمبشت ءِ سیاسی سنگر توانمند کُرتگ، بیا اِت ما دُرس ھواری ءَ کول کن ایں کہ داں بلوچستان ءِ آجوئی ءَ مئے جُھد برجاہ بیت ءُ دیمونی ءِ سپر اوشت ءِ آماچ نہ بیت۔ما سدکیں کہ آ روچ دور نہ اِنت کہ وھدے بلوچستان یک آجو ءُ وتواکیں ریاستے ءِ بستار ءَ جھان ءِ نکش ءِ تہ ءَ ھوار بیت ءُ د
