بلوچ آجوئی لوٹوکیں سروک اکتر ندیم ءَ ماں رسانکدر ءَ وتی شنگ کُرتگیں درشانے ءَ گْوشتگ کہ توانمندی،اوپار،ھم پَتّی ءُ ھم سنتی مدام گھگیری ءِ بنیاد بیتگ اَنت ءُ گْوستانک ءَ پدر بیتگ کہ اے شری مزن مزنیں زوراکان ءَ پروش دنت۔ مرچی کہ ما ریاست ءِ زوراکیانی دیم پہ دیمی ءَ کنگ ءَ ایں، اے یات دارگی اِنت کہ آجوئی پہ بلوچ راج ءَ ایوک ءَ یک وابے نہ اِنت بلکیں مئے نسیب ءَ اِنت۔
آئی ءَ گوشتگ کہ بلوچ پجار ءُ ھستی ءِ جُھد یک نازُرکیں جاھے ءَ سر بیتگ۔ یک نیمگے بلوچ راج پہ وتی دودمان ءُ پہ وتی ھستمان ءِ رکینگ ءَ جنگ کنگ ءَ اِنت ءُ دومی نیمگ ءَ ما چہ ریاست ءِ نیمگ ءَ زور ءُ زوراکی ءِ یک نوکتریں دْرچے گندگ ءَ ایں۔اے زوراکی ایوک ءَ بلوچ راج ءِ ارواہ ءِ سر ءَ تچکی ءَ اُرش کنگ اِنت۔
اکتر ندیم ءَ گوشتگ کہ جُھد ءُ کوشستاں بلوچ راج ءِ تہ ءَ سیت ءُ کول ءِ تہ ءَ نوکیں جوزگے ودی کُرتگ کہ مارا یات پرین ایت کہ مئے جُھد بے سیت نہ بیت۔ مئے شھیدانی دیمونی ءُ مئے راج ءِ جنجال بےھال کنگ نہ بنت۔آیاں مئے تہ ءَ ھنچیں آسے روک کُرتگ کہ ایشی ءَ ریاست ءِ زوراکی کُشت نہ کنت۔
آئی ءَ گوشتگ کہ چین ءُ آدگہ دُرسیں راج کہ وتی مالکاری ءُ زمینی راجداری سیتاں بستار دے اَنت ما آیاں گْوشگ لوٹ ایں کہ بلوچستان ءِ پھریزگ،مئے جنینانی شرپ ءُ مئے مردمانی شرپ مارا چہ دری ڈیھانی مالکاریاں گیش دوستِر اِنت۔ بلوچ راج پاکستان ءِ مئے سرڈگار ءِ سر ءَ مدامی زورگر ءُ لُٹ ءُ پُل ءِ آماچ اِنت۔
بلوچ سروک ءَ گوشتگ کہ ما چین ءَ ھوار میان استمان ءَ زور دئیں آ سرپد بہ بنت کہ بلوچ راج رازی بیگ ءُ ھوار بیگ ءَ ابید بلوچستان ءَ ھچ مالکاری نہ تیوک ءَ ھنچائین یے بلکیں بے سیت اِنت ھم۔ اے ھچ وڑ ءَ منّگ نہ بیت کہ اے مئے ھکانی بگیری ءُ پہ آجوئی ءَ مئے جُھد ءِ مانیارگ اِنت۔جھان ءَ منّگ لوٹ ایت کہ وھدے مئے زمین پُلگ ءُ مئے مردمانی سر ءَ زوراکی کنگ بیت گڑا بلوچ راج ھچ پیم ءَ بے توار نہ بیت۔
اکتر ندیم ءَ گوشتگ کہ گُڈی ءَ مئے کلوہ تچک اِنت کہ بلوچ راج پہ وتی آجوئی، پہ وتی ھک ءُ باندات ءَ جنگ کنت۔ما بے توار نہ بہ ایں ءُ ما پروش ھم نہ بہ ایں، آ روچ کیت وھدے بلوچستان آجو بیت ءُ مئے مردمانی دیمونی پہ بستارے چارگ بنت۔
