مروچی سرجمیں جھان گندگ ءَ اِنت کہ دست ءُ گوش ، ایکم ءُ پرایمنیں مردمانی سر ءَ تیرگواری کنگ بیتگ وھدے کہ مردم ایکم بیتگ اَنت ءُ آیاں ھچ وڑیں کنتی کارے نہ کرتگ۔
بلوچ راجی زْرمبشت ( بی این ایم ) ءِ جارکش ءَ وتی درشانے ءَ گْوشتگ کہ بلوچ ءُ پاکستان ءِ سیادی چہ بنداتی روچاں گیش اتگ ، بلوچستان نوک آبادی پاکستان زورگر ، پنجابی زورگریں واک ءُ بلوچ زیردستیں راج اِنت۔ پاکستان ءَ گوں زور ءَ راجی مچی داشتگ ءُ یک رندے پد ءَ اے گواچن کرتگ کہ ماں بلوچستان ءَ پہ مردمی اگبالاں ھم پرایمنیں جھد بے سیت اِنت بلے مھترھندی زوراکی ءِ چپ ءَ بلوچ پرایمنیں گھگیریں جھد ءَ برجاہ دار ایت۔مروچی سرجمیں جھان گندگ ءَ اِنت کہ دست ءُ گوش ، ایکم ءُ پرایمنیں مردمانی سر ءَ تیرگواری کنگ بیتگ وھدے کہ مردم ایکم بیتگ اَنت ءُ آیاں ھچ وڑیں کنتی کارے نہ کرتگ۔
آئی ءَ گْوشتگ بلوچ ھم سنتی پتر مردمی اگبالانی مردمی زْرمبشتے کہ آئی ءَ ماں بلوچستان ءَ مردمی اگبالانی بگیری ءَ گوادر ءَ پہ ’ راجی مچی ‘ ءَ توار جتگ اَت۔ اے زْرمبشت ءِ لوٹ ھما اگبالانی سرسبزی اِنت کہ آیانی مانزمانی پاکستان ءِ وتی آئین ھم دنت۔اگاں چہ پاکستانی مھترھند ءِ نیمگ ءَ زور کارمرد کنگ مہ بوتیں اے مچی سرجم ءَ پرایمن، ایکم ءُ پھریز بیتگ اَت بلے پاکستانی لشکر ءَ ھمک شھر ، ھمک پیچ ءُ ھمک شھدگ ءَ اڑاند داتگ ءُ پہ مردمانی دارگ ءَ آیانی ھون ریتکگ اَنت۔ بی وائی سی ءِ پجیگ ءَ پہ مردمی اگبالاں کار کنوکیں ھمک مردم دارگ بیتگ ءُ بازیں راھشون اش زور بیگواہ کرتگ۔پاکستانی لشکر ءِ تچکیں تیرگواری ءَ دھاں مردم ٹپی بیتگ ءُ داں انیگ ءَ کم ءَ کم دو مردمانی کوش ءِ دلجمیں ھال ھست کہ پاکستانی لشکراں ماں گوادر ءَ تیر جتگ ءُ کشتگ اَنت۔
جارکش ءَ گْوشتگ گوادر سرجم ءَ انگر کنگ بیتگ ، گوادر ءِ زمینی راہ ءُ موبائل نیٹورک بند کنگ بیتگ اَنت۔آ اود ءِ راستیں جاور ءِ زانگ سکا مشکل جوڑ کنگ بیتگ۔ گڈی ھالانی رد ءَ پرکاریں مردمی اگبالانی کارکنانی دزگیری ءَ بیڑ برگ بیگ ءَ اَت ، بازیں مردمانی پجار کارڈ ، موبائل سم ءُ بینک اکاؤنٹ بند کنگ بیتگ اَنت۔سرجم ءَ پرایمنیں مچی یے بگیری ءَ زور ءِ اے کچیں کارمردی پاکستانی راجمستری ، سیاسی گل ءُ درسیں راجمستریں تْرامگیجانی دیم ءَ پہ مدامی لچ اتگیں سیاھچکے ، اے بھ پلگار نہ بیت۔زوراکی ءَ پد ھم بلوچ راج ءَ مچی ءِ جاہ ءَ یکجاہ بیگ ءِ کوشست کرتگ ، ھزاراں مردم مچ بیتگ ۔اے زورگر ءِ واک ءِ بگیری ءَ بلوچ راج ءِ شور اِنت کہ بلوچ گلزمین ءِ سر ءَ زورگری ءُ زرواکی ءَ نہ من ایں۔
آئی ءَ گْوشتگ پاکستان ءِ ھستی پہ بلوچ ءِ مانشت ءَ چہ درساں مستریں ترسے ، چہ ایشی ءِ آسر کنگ ءَ نی بلوچ راج رستگار بیت۔ درسیں بلوچ گوں ھم دستی ءَ دیم ءِ شور ءُ شونداتاں بہ ٹاھین اَنت۔درسیں بگیری ءُ لیکھی چپدانکانی پجیگ ءَ ھواریں راجی سیت گیشینگی اَنت ھمک بلوچ ’ سیاسی گل ءُ لیکھی بگیریاں ‘ بہ انگار ایت ءُ گیش اتگیں راجی سیتانی سر ءَ پت بہ بیت۔
امریکی کمک ءِ پیشنھاد ءِ سر ءَ بے تاھیری درشان کنان جارکش ءَ گْوشتگ امریکی واکدارانی تہ ءَ لھتے مردم چہ وتی سرکار ءَ پہ پاکستان ءَ کمک پچ گرگ ءِ کوشست ءَ اِنت ، اے پہ ما بے تاھیری گپے۔ اے چہ مردمی دوداں دیم گرگ اِنت ۔ پاکستان رنگیں ملکے ءِ سر ءَ کہ آئی ءِ تہ ءَ مردمگری ءَ ھچ ارزشت نیست چہ امریکی شھرمنندانی ھون ءُ ھیداں مچ کنگ بیتگیں زر ھرچ کنگ بہ بہ اَنت۔ ما باز بر ءَ گْوشتگ کہ پاکستان ءَ امریکی کمک مردمگری ءِ بگیری ءَ بلکیں امریکی سیتانی بگیری ءَ ھم کارمرد کرتگ اَنت۔
’ چہ امریکی سرکار ءُ سینیٹراں دزبندی اِنت کہ آ پاکستان رنگیں ڈیھانی کمک ءِ جاہ ءَ دیناداسی بلوچستان ءِ آجوئی ءِ زْرمبشت ءِ پلہ مرزی بہ کن اَنت۔ بلوچ ، پشتون ، سندی ءُ دگہ چیردستیں راجانی تچکیں کمک ءَ دمگ ءِ جاور مٹ بیت ءُ چہ ایشی ءَ جھان ءَ سیت رس ایت۔
آئی ءَ گْوشتگ بلوچستان ءَ ’ مردمی اگبالانی پہ پاکستان ءَ پتر ‘ ( ایچ آر سی پی ) رنگیں مردمی اگبالانی من اتگیں تْرامگیجانی زمہ واراں ھم پہ مردمی اگبالانی جاور ءِ سھرا کنگ ءَ گر ءُ بند ءُ بیھارانی دیمپانی اِنت اے ھما بدتریں جاور اِنت کہ پہ ایشی ءِ گھتر کنگ ءَ راجانی سنت ءِ پجیگ ءَ دگہ میان استمانی تْرامگیجاں زیتیں گامگیج زیرگ لوٹ ایت۔ ما سرپد بہ ایں کہ راجانی سنت بلوچستان ءِ جاور ءِ گھتر کنگ ءَ شریں کردے پیلو کرت کنت۔
