شال: پاکستانی لشکر ءُ چیریں ادارھانی کارمنداں پہ گْوادر راجی مچی ءَ روگ ءَ چن لانچ ءَ بوتگیں پنچ مردم آوار جتگ ءُ بیگواہ کرتگ اَنت۔
اھوالکار ءِ رد ءَ بیگواہ کنگ بوتگیں مردمانی تہ ءَ بی ایس او ءِ سرکماش جیھند ءُ آئی ھمبل شیر باز ھوار اَنت۔
جیھند ءُ آئی ھمبل ءِ زوریں بیگواھی ءِ گپ آئی پارٹی ءِ سروک ءَ راست کرتگ ءُ گوشتگ کہ دگہ سے مردم انگت ءَ پجارگ نہ بوتگ اَنت۔
آئی گوشگ اِنت کہ جیھند ءُ آدگہ ھمبل پہ بلوچ راجی مچی ءَ چن ءُ لانچ کنگ ءَ بوتگ اَنت کہ آوار جنگ بوتگ اَنت۔
یات بہ بہ اِت کہ بلوچ یکجھتی کمیٹی ءِ نیمگ ءَ پہ راجی مچی ءَ کارکنوکیں بی وائی سی ءِ باسکاں ھوار درزنانی کچ ءَ مردم چہ بلوچستان ءُ بلوچستان ءَ ڈن آوار جنگ ءُ بیگواہ کنگ بوتگ اَنت۔
پہ گْوادر ءَ راجی مچی ءَ بھر زورگ ءِ پژدر ءَ ڈیرہ گازی ھان ءَ بلوچ نودربر ءُ مردمانی ھکانی کارکن سادیہ ءِ کھول ھم پولیس ءِ نیمگ ءَ زوراکیانی نشانگ کنگ بوتگ۔
گوادر ءَ ھوار تربت ءُ پنجگور ءَ ھم دامگ بند کنگ ءُ تلار ءَ پاکستانی لشکر ءَ دگ بستگ ءُ مردماں روگ ءَ نہ ھلگ ءَ اِنت۔
زورگریں پاکستانی لشکر ءِ نیمگ ءَ زوراکیاں ابید بلوچستان ءِ جتائیں ھند ءُ دمگاں پہ راجی مچی ءِ بھر زورگ ءَ کاروان روگ ءَ اَنت۔
چہ بازیں ھند ءُ دمگاں باندا کاروان در کپ اَنت ءُ دیم پہ گْوادر ءَ رو اَنت۔
اے باروا بلوچ یکجھتی کمیٹی ءِ سروک ڈاکٹر ماہ رنگ ءِ گوشگ اِنت کہ پاکستانی لشکر ءَ کجام جاہ ءَ مردم داشتگ اَنت ءُ آھگ ءَ نہ اشت اَنت گڑا مردم ھما جاہ ءَ وتی زھرشانی ءَ برجاہ بدار اَنت۔
