ھزدار: گوستگیں روچ ءَ گریشگ ءِ میتگ کوچو ءَ سی ٹی ڈی ءِ اُرش ءَ مردمانی ٹپی بوگ ءُ ورنایانی زوریں بیگواھی ءِ بگیری ءَ کھولانی نیمگ ءَ سی پیک دگ ءَ زھرشانی نندانک برجاہ اِنت۔
زھرشانی نندانک ءَ زور بیگواھیں مردمانی کھولانی ھواری ءَ جتائیں بھرگاں سیادی داروکیں مردماں بازیں کچے ءَ بھر زرتگ۔
یک شمبے ءِ روچ ءَ گریشگ ٹوبڑو ءَ سی پیک دگ ءِ بند بوگ ءِ ھواری ءَ نال بازار ءَ تھتگ بند ھرتال کنگ بوتگ۔
زھرشانی کنوکیں مردماں گوں گریشگ ءِ نزیکیں ھند نال، کودہ، کوڑاسک ءِ مردماں لوٹ کرتگ کہ بیا اَنت ءُ مئے زھرشانی ءَ ھوار بہ بنت ءُ ریاستی لشکر ءِ زوراکیانی بگیری ءَ توار چست بہ کن اَنت۔
