![](https://zrumbesh.com/wp-content/uploads/2024/07/WhatsApp-Image-2024-07-11-at-01.09.50_768bd233-1024x613.jpg)
بلوچ یککجھتی کمیٹی ءِ سروک ڈاکٹر ماہ رنگ ءَ ماں چاگری رسانکدر ایکس ءَ بنوں ءَ پشتونانی روانک ءِ سر ءَ ارش ءِ پژدر ءَ نبشتگ کہ بنوں ءَ ناشرکاری ءِ بگیری ءَ کشگ بوتگیں روانک ءِ سر ءَ ارش پشتون چکچنی ءِدرچ اِنت کہ چہ گوستگیں دھکاں برجاہ اِنت۔ اجبیں ریاستے، مردم پہ ایمنیءِ لوٹ ءَ دگاں در کپ اَنت گڑا ریاست آیانی کشت ءُ کوش ءَ کنت۔اے جاور بلوچستان ءِ تہ ءَ برجاہ اَنت۔
آئی ءَ گوشتگ کہ بلوچ چکچینی ءِ بگیری ءَ بلوچ یکجھتی کمیٹی راجی مچی یے برجم دارگ ءَ اِنت۔ بلے ریاست پہ راجی مچی ءِ دارگ ءَ وتی درسیں زوراں کارمرز کنگ ءَ اِنت ءُ سکا زوراکی ءِ رویشت ئے برجاہ داشتگ۔ اے بلوچستان ءُ پکتونواہ ءِ جاور اَنت، اود ءَ ھزارانی کچ ءَ مردم ریاست ءِ زوراکیانی بگیری ءَ دگانی سر ءَ زھرشانی کنگ ءَ اَنت۔
ڈاکٹر ماہ رنگ ءَ گوشتگ کہ ریاست بلوچ ءُ پشتونانی چکچینی ءِ ھلاس کنگ ءِجاہ ءَ پر ایمنیں زھرشانی کنوکانی سر ءَ ارش کنگ ءَ اِنت۔ بلے وتگڑیں رسانکدر، اھوالکارءُ راجکاراں وتی میارباریں بے تواری برجاہ داشتگ۔ آیاں ریاست ءِ نیمگ ءَ تیوک ءَ بلوچستان ءُ پکتونواہ ءِ مڈی چمءَ کاینت بلے بیوکیں زوراکیانی باروا آیاں وتی چم بند کرتگ اَنت۔
بی وائی سی ءِ سروک ءَ گوشتگ کہ من گوں بلوچ ءُ پشتون راج ءَ لوٹ کن آں کہ آ وتی میان ءَ ھم پتی ءُ یکمشتی ودی بہ کن اَنت۔ ما ھواریں جھد ءِ پارست ءَ وتی سرڈگارانی سر ءَ اے زوراکیاں ھلاس کن ایں۔