بلوچستان آجوئی سنگر ( بی ایل ایپ )ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں کیچ ءِ ھند کولواہ ءَ زورگریں پاکستانی لشکر ءِ دو پرپٹ سواریں کارمندانی سر ءَ اُرش کُرتگ۔
آئی ءَ گوشتگ کہ مرچی 18 جولائی ءِ روچ ءِ سَے ءَ رودکان کولواہ ءَ سرمچاراں زورگریں پاکستانی لشکر ءِ دو پرپٹ سواریں کارمندانی سر ءَ گوں وتکاریں سلاھاں اُرش کُرتگ، اُرش ءَ دژمن ءِ یک کارمندے مُرتگ ءُ یکے ٹپی بیتگ۔
جارکش ءَ گوشتگ کہ اے اُرش ھما وھد ءَ کنگ بیتگ وھدے کہ دژمنیں لشکر لوکل گاڑیانی سر ءَ وتی راشناں برگ ءَ بیتگ۔
آئی ءَ گوشتگ کہ پروش وارتگیں دژمن چہ سرمچارانی اُرشانی تُرس ءَ وتی راشن ءَ وت بُرت نہ کن اَنت،پہ اے کار ءَ آ لوکل گاڑیاں کارمرز کنگ ءَ اِنت۔
جارکش ءَ گوشتگ کہ ما لس مردم ءُ لوکل گاڑیانی واھند ءُ ڈرائیوراں کڈن کن ایں کہ آ دژمن ءِ دست ءَ کارمرز ءُ وتی زْرمبشت ءِ دیم ءَ اڈاند جوڑ مہ بنت، اے زْرمبشت ءَ بلوچ راج ءَ باز دیمونی داتگ، ھرکس اے زْرمبشت ءِ دیم ءَ اڈاند جوڑ بیگ ءِ جُھد ءَ بہ کنت گڑا وتی جان ءُ مال ءِ تاوان ءِ زمہ وار وت اِنت۔
میجر گھرام ءَ ارش ءِ زمہ واری من اتگ گوشتگ کہ داں سرڈگار ءِ آجوئی ءَ سرمچارانی اُرش زورگریں لشکر ءُ آئی ءِ کمکارانی سر ءَ برجاہ بنت۔
