![](https://zrumbesh.com/wp-content/uploads/2024/07/WhatsApp-Image-2024-07-18-at-08.37.11_460b812b.jpg)
بلوچ وومن پورم سوراب ھنکین ءِ آرگنائزنگ باڈی دیوان بُنجاھی کماش ڈاکٹر شلی ءِ سروکی ءَ برجم دارگ بوتگ ، دیوان ءِ گچینی مھمان ءِ بُنجاھی پتر ءِ باسک شھناز بوتگ ۔
دیوان ءِ بُن گپ پجّاری نشست، مرکزی سرکولر ،،گل ءِ کار ،ھندی ءُ میان اُستمانی سیاسی جاور ءُ آؤکیں گام گیج بوتگ اَنت ، دیوان ءِ بندات ءَ سنگتاں وتی پجّار کرتگ چہ آئی پد بُنجاھی سنگتاں مرکزی سرکولر ونتگ ءُ گل ءِ کار ء بنگپ ءَ سنگتاں تران کنان ءَ گوشتگ کہ مارا اے ھند ءَ باز کار کنگی اِنت ھمک لس جنین ءِھیل دیگ مئے بنداتی گامگیج بہ بیت دانکہ آیاناں ریاستی پندل ، گیرت ءِ نام سراکُشگ ءُ چاگردی جیڑھانی بابت ءَ سرپدی دیگی اِنت ،مارا جنین انچو تیار کنگی اَنت کہ باندا روچ آ زوراکی ءِ بگیری ءَ اوشتگ ءَ چک ءُ پد مہ بنت۔
دیمترا سنگتاں تران کنان ءَ گوشتگ اگاں ما اے ھند ءُ دمگاں بچارے ادا ریاست ءِ نیمگ ءَ باز کار کنگ بوتگ ءُ اودے مردم انچو ترس ءُ بیم ءِ آماچ کنگ بوتگ اَنت کہ آ ریاستی ءُ چاگردی جیڑھانی سرا توار چست کُت ماہ کن اَنت ، چوناھا ما کہ نو آبادکاریں نزام ءَ واناں گُڑا اودا وڑ وڑیں جیڑہ سر کشی ایت ، ایردستیں راج وڑ وڑیں نادراھی ءِ ھم آماچ بیت ، چوناھیگ ءَ ما بچاریں بلوچستان ءِ چوشیں میتگے پشت نہ کپتگ کہ آ اے زوراکی ءَ چہ رکیتگ بلوچ ءِ ھمک گدان مروچی ریاستی زوراکیانی دیمپان اِنت ۔ بلوچستان ءِ تہ ءَ کشندہ ٹولی تچکی ءَ کار کنگ ءَ اَنت آیاناں ھمینچو واک دیگ بوتگ کہ تچک ءَ بلوچ ءَ گار ءُ بیگواہ ءُ جنگ ءُ کُشگ ءَ اَنت ، ایشاں میتگانی تہ ءَ انچیں بیمے ودی کرتگ کہ تو گندگ ئے تئی سرا زوراکی بوگ ءَ اِنت بلے انگت توار چست کنگ ءَ ترس اَنت مردم ، سوراب ءُ ھمے نیمگ ءِ میتگانی تہ ءَ کشندہ ٹولی تچکی ءَ مردماں بیھار دے اَنت ،آیاں گارءُ بیگواہ کنگ ءَ اَنت اے زوراکیانی ھما وھد ءَ دیم دارگ بیت کہ وھدے اودے نندوکیں مردم اے زوراکیانی بگیری ءَ پاد بیا اَنت ، جنیناں ھوار مارا بلوچستان ءِ ھمک مردم ءِسیاسی ھیلکاری کنگی اِنت ، آیاں ھمک جیڑہ ءُ ریاستی پندل ءِبارواپوہ ءُ سرپد کنگی اِنت دانکہ بلوچ وتی سرا بوؤکیں زوراکی ءُ بلوچ چُکچینی ءِ بگیری ءَ توار چست بہ کنت ۔
سنگتاں تران کنان ءَ گوشتگ اے پھناتاںننگ ءِ نام ءِ سرا جنک ءُ بچک ءِ کشگ گوں ترندی ءَ برجاہ اِنت پدا اے جیڑھانی سوڑگ ءَ ھما ھندی سردار کنت کہ آ وت ریاست ءِ پیدا کتگینے ، مروچی اے چیز سک ارزیشت دار ایت کہ ما وتی راج ءِ تہ ءَ سرپدی پیداک بہ کناں کہ ننگ ءِ نام وتی جنکاں یا بچکاں مہ کشاں ، مروچی بلوچ ءِ ننگ ریاستی ازار سگگ ءَ اَنت ، زندانی اَنت ، دگانی سرا در پہ در اَنت ،مروچی بلوچ ننگ ءِ دگانی سرا سرءِ گوشان اِش کشگ بوگ ءَ اِنت گڈا شرتر اِنت کہ منی ءُ تئی گیرت ادا پاد بیت کہ ریاست ءَ پادمال کرتگ۔ پمیشکا ءِ جنین ھیلکاری ءِ سرا گیش زور دیگ ءَ اِنت پرچا کہ وھدے جنین ھیل دیگ بیت گڑا سرجمیں راجے ءِ ھیلکاری بیت ءُ یک ایردستیں راجے ءِ تہ ءَ وھدیکہ جنین شیوار، زانتکار ءُ آشوبی بوت گُڑا ھما کارا کُت کنت کہ آ کارا مردین آدم بھ کُت نہ کنت ، زرمبشتانی سوبمندی ءِ تہ ءَ جنینانی مزنیں کردے ھست اِنت ، جنین آبادی ءِ نیم اِنت اگاں نیم آبادی سیاسی پارست ءَ پوہ ءُ سرپد مہ بیت گڑا آ راج ھچبر دیمروئی کت نہ کنت ۔
گُڈی ءَ آؤکیں گام گیج ءِ تہ ءَ سوراب ھنکین جوڑ کنگ بوتگ سانیہ کماش ، نایاب کمک سرکماش ءُ اپرا ،نجیبہ ءُ زیمل باسک گچین کنگ بوتگ اَنت