![](https://zrumbesh.com/wp-content/uploads/2024/07/WhatsApp-Image-2024-07-17-at-10.59.56_b18b0ad8.jpg)
بیگواھیں بلوچانی توار ( بی وی بی ایم ) ءِ کارگشاد سمی دین ءَ وتی تامربندے ءَ گوشتگ کہ بلوچ ءِ زندمان ءِ درسیں تک ءُ پھنات پہ بلوچ ءَ تنگ کنگ بوتگ اَنت۔ بلوچ ءِ باندات بہ بیت یا کہ مرچیگیں ایمنی ءُ آسراتیانی جیڑہ بہ بیت، بلوچ ءِ پجار ءُ پدریچ ءِ جیڑہ بہ بیت، بلوچ ھمک نیمگ ءَ سانمند کنگ بوتگ۔ مرچیگیں جھان گوں ترندی ءَ دیمروئی کنگ ءَ اِنت بلے بلوچ پشت کپتگ۔ بلوچ ھمک روچ جیڑھانی یمپان کنگ بیت بلوچ وت نزانت کہ من پہ کجام جیڑہ ءِ بگیری ءِ پاد بیاھاں ءُ دگانی سر ءَ زھرشانی بہ کناں، مرچی بلوچ وتی سرڈگار ءِ سر ءِ ھم پھریزنہ اِنت۔
آئی ءَ گوشتگ کہ ھما بلوچ چہ سداں سالاں وتی جند ءِ سرڈگار ءِ سر ءَ زند گوازینگ ءَ بوتگ ھما بلوچ مرچی چہ وتی گس ءُ میتگاں کشگءُ لڈینگ بوتگ اَنت۔ ھزارانی کچ ءَ بلوچ مرچی پاکستان ءِ آزار جاھاں بند اَنت کس نہ زانت کہ چون ءُ چے پیم زند گوازینگ ءَ اَنت۔ آیانی ساڑی نہ بوگ ءَ کھول کجام داب ءَ زندگی گوازینگ ءَ اَنت ا ےمئے ءُ شمئے چمانی دیم ءَ اَنت۔ مرچی مئے بلوچ ورنایانی تیرسپتیں ژانگولیں لاش کورءُ جنگلانی تہ ءَ دست کپگ ءَ اَنت۔ مرچی بلوچ ءِ ھمک جیڑہ پہ آئی جنگے جوڑ کنگ بوتگ۔ مرچی مئے ءُ شمئے زندمان جنگے ءِ بھر اِنت۔ ما جنگ نہ لوٹ ایں بلکیں پر ایمنی لوٹ ایں پہ وتی زندمان ءِ پرایمنی ءُ آسودگی ءَ مارا شمارا یکجاہ بوگ لوٹ ایت۔
سمی دین ءَ گوشتگ کہ بلوچ یکجھتی کمیٹی ءِ نیمگ ءَ ھمے ماہ ءَ28 جولائی ءَ گوادر ءَ یک راجی مچی یے برجم دارگ بوگ ءَ اِنت۔ اے راجی مچی ءِ سوبمند کنگ ءُ یک زورے ءِ پیشدارگ مئے ءُشمئے زمہ واری اِنت۔ بیا اِت ماءُ شما یکجاہ بہ ایں ءُ سرجمیں جھان ءَ پیش دار ایں کہ چہ بلوچ ءِ زندگوزینگ ءِ ھک پلگ بوتگ، بلوچ ھمائی بگیری ءَ اوشتاتگ ءُ آئی ءِ منگ ءَ نہ اِنت۔ بلوچ ءَ ھمے سوڑگ کرتگ کہ بلوچ آئی زوراکیاں نہ من ایت۔ من گوں بلوچ راج ءَ دزبندی کن آں کہ بلوچ راجی مچی ءَ بھر بزور اِنت ءُ سوبین بہ کن اَنت۔