![](https://zrumbesh.com/wp-content/uploads/2024/07/WhatsApp-Image-2024-07-13-at-11.39.52_693dc5f3.jpg)
شال: چہ زھرشانی نند انک جاہ ءَ بلوچ نودربر ءُ بلوچ یکجھتی کمیٹی ءِ سروک ڈاکٹر سبیہ ءَ تران کرتگ ءُ گوشتگ کہ سرکاری مردم پہ پرایمنیں زھرشانی ءِ ھلاس کنگ ءَ جتائیں پندل سازگ ءَ اَنت۔ سرکار ءِ گپ ءُ ترانی ٹولی گپ ءُ تران ءَ ابید جاورانی گیش ناگیگ کنگ ءِجھد ءَ اَنت۔
آئی ءَ گوشتگ کہ ما سرکاری مردماں گوشگ لوٹ ایں دانکہ مئے ھمبل یل کنگ نہ بوتگ اَنت ءُزھرشانی نندانک ءِ لوٹ پیلو کنگ نہ بوتگ اَنت مئے زھرشانی نندانک شال ءِ ریڈ زون ءَ برجاہ بیت۔
ڈاکٹر سبیہ ءَ گوشتگ کہ ما پر ایمنیں مردم ایں گوستگیں روچ ءَ گوں پرایمنی ءَ زھرشانی کنگ ءَ بوتگ ایں سرکار ءِ پرمان ءِ رد ءَ پولیس ءَ مئے ھمبل زوراکی ءِ نشانگ کرتگ اَنت۔ سرکار ءِ جھگیر وتی نابودی ءُ بے سوبیانی چیر دیگ ءَ مئے زھرشانی کنوکانی سر ءَ پرشت ءُ پرش کنگ ءِ بھتام ءَ جنگ ءَ اِنت۔
آئی ءَ دیمتر ءَ گوشتگ: ما سرکار ءَ گوشگ لوٹ ایں کہ مئے پر ایمنیں زھرشانی برجاہ بیت ءُ گپ ءُ تران ھما وھد ءَ بیت کہ مئے ھمبل آجو بنت۔ اگاں نہ زھرشانی کنوکانی بگیری ءَ چونیں گامگیجے زورگ بوت ایشی زمہ وار بلوچستان سرکار اِنت۔