تربت: چہ کیچ ءِ جتائیں ھنداں زور بیگواہ کنگ بوتگیں مردمانی کھولاں زوریں بیگواھی ءُ شال ءَ زھرشانی کنوکیں مردمانی سر ءَ پولیس ءِ بیڑ برگ ءُ لٹ شاپ ءُ زھرشانی کنوکا نی دزگیری ءِ بگیری ءَ زھرشانی روانکے کشگ بوتگ۔
زھرشانی ءَ بی وائی سی ءِ سروک سبگت اللہ شاہ جی ءَ ھوار آدگہ سیاسی ءُ چاگردی کارکناں ھوار جتائیں بھرگاں داروکیں مردماں بازیں کچے ءَ بھر زرتگ۔ زھرشانی روانک چہ شھید پدا اھمد چاراہ ءَ درکپتگ ءُ کیچ دمگدار ءِ کارگس ءِ دیم ءَ مچ بوتگ اَنت۔ زھرشانی کنوکیں مردماں زور بیگواھیں مردمانی اکس، بینرز ءُ پلے کارڈ دستاں بوتگ۔
زھرشانی کنوکیں مردماں تران کرتگ ءُ گوشتگ کہ پہ وتی آزیزانی آجوئی ءَ ما دمگدارءِ کارگس ءِ دیم ءَ نندانک ءُ شدکشیں ھرتال ءَ ھوار دگاں ھم بند کن ایں۔
یات بہ بہ اِت کہ کیچ ءِ جتائیں ھندانی زور بیگواھیں مردما نی کھول ءَ گوستگیں روچ ءَ پریس کانپریس کرتگ اَت ءُ آیاں واکدار ءِ کارگس ءِ دیم ءَ زھرشانی ءَ نندگ ءِ جار جتگ اَت۔
