![](https://zrumbesh.com/wp-content/uploads/2024/07/WhatsApp-Image-2024-07-12-at-10.41.43_c262dfcc.jpg)
شال: زور بیگواھیں زھیر ءِ کھول ءِ نیمگ ءَ کشگ بوتگیں زھرشانی روانک ءَ ھزارانی کچ ءَ مردماں بھر زرتگ، ریڈ زون ءِ ھاکی چاراہ ءَ مچی ءَ بلوچ یکجھتی کمیٹی ءِ سروک ڈاکٹر ماہ رنگ ءَ تران کرتگ ءُ گوشتگ کہ چہ زھرشانی کنوکاں چل مردم انگت ءَ بندیگجاہ ءَ بند اِنت۔ شال پولیس اسلام آباد پولیس ءِ وڑ ءِ کنگ ءَ اِنت۔ داں وتی لوٹانی پیلو کنگ ءَ زھرشانی نندانک برجاہ بیت۔
آئی ءَ گوشتگ کہ اگاں سرکار سنگین نہ بوت مردمانی اے توپان دیم ءَ جنز ایت ءُ پہ وت راہ پچ کنت۔ ما پر ایمنیں مردم ایں ءُ دیم ءَ ھم پر ایمنیں جھد کن ایں۔
ڈاکٹر ماہ رنگ ءَ گوشتگ کہ مئے کر ءَ گپ کم اَنت بلے جوزگ گیش اَنت، درد گیش اَنت ما پہ وتی مردمانی رکینگ ءَ یکجاہ بوت ءُ جھد کرت کن ایں۔ ھما لشکری کارمند کہ اد ءَ جنینانی شلواراں چک اَنت اے اود ءَ کینٹ ءَ ھم شت کن اَنت۔
آئی ءَ گوشتگ کہ مئے جھد پہ زھیر ءِ آجوئی ءَ اِنت ماپہ وتی اے لوٹ ءَ یک گامے پشت ءَ نہ کنز ایں، دانکہ زھیر آجو نہ بوتگ مئے زھرشانی نندانک ھمد ءَ برجاہ بیت۔