دو راجی لیکہ ھمود ءَ کل بیتگ بلے اے مھترھند ءَ چہ اے گْوستانک ءَ ھچ در نہ برتگ
بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ وتی درشانے ءِ تہ ءَ گْوشتگ ، پاکستانی مھترھند ءُ مھترھندی لشکر بلوچستان ءِ ھمک کنڈ ءَ زوراکی ءُ ناراھی ءِ نوکیں درے نبشتہ کنگ ءَ اَنت۔مچ ڈنڈ دیگ ءِ بیم ءُ ترسناکیں لشکری شوندات ءِ رد ءَ دست ءُ گوشیں مردماں دزگیر کنگ ءَ پد زور بیگواہ کنگ ، ناراہ ءُ بے راھبندی کشگ ، پرایمنیں زھرشانی کنوکاں لٹ دیگ ءُ جنینانی کم منگہ کنگ ھم روچیگیں کار جوڑ بیتگ اَنت۔ زھیر ءِ آوار جنی ءِ بگیری ءَ بیوکیں زھرشانی ءِ سر ءَ تیرگواری ، لٹ شاپ کنگ ءُ ارس ریچیں گیس چگل دیگ پدریں مھترھندی ناشر کاری اِنت۔
ڈاکٹر نسیم ءَ گْوشتگ پاکستان ءِ زورشاھی ءُ زوراکی پہ ایشی ءِ سھرا کنگ ءَ بس اِنت کہ ’’ بلوچ چیردست اَنت ءُ پاکستان ھم چوش آ دگہ بے دودیں نوک آبادی تواناں ایردستانی زْرمبشت ، زھرشانی ءُ زار ءُ چیھالاں ایوک ءَ تپنگ ءُ لشکر ءِ زور ءَ دارگ ءِ سر ءَ باور کنت بلے گْوستانکی راستیاں باز بر ءَ اے گواچن کرتگ کہ راستیانی بنیاد ءَ برجاھیں ھچ زْرمبشتے داں مروچیگ ءَ جھان ءِ ھچ وڑیں توانے ءَ پروش دات نہ کرتگ۔ بلوچ ھم گوں گْوستانکی راستی ، وتی واک ءِ سما ءُ باندات ءِ گیشوار ءَ دیم ءَ روگ ءَ اَنت ءُ یکشلیں دیمونی ایشی ءِ گواچن اَنت۔
ڈاکٹر نسیم ءَ گْوشتگ پاکستان ءَ شور کرتگ کہ آ ناں گْوستانک وان ایت ءُ ناں چہ گْوستانک ءَ دربرگ ءِ کوشست کنت ، روکپتی واکانی منشی ءُ پانپاھاں نام گپتیں ’ دو راجی لیکہ ءِ دروگ ءِ سر ءَ بلوچ ، پشتون ءُ سندیانی سرزمین چیرجتگ ءُ اے مھترھند ءَ ھاوند ساچ ءُ ھاوند ءِ واھگ لیکگ رنگیں مزن مردی کرتگ بلے نام گپتیں اسلام ءِ کلات ءَ بیست ءُ پنچ سال سرجم نہ کرت ءُ دو گپڑ بوت۔ دو راجی لیکہ ھمود ءَ کل بیتگ بلے اے مھترھند ءَ چہ اے گْوستانک ءَ ھچ در نہ برتگ۔
آئی ءَ گْوشتگ شال ءَ بلوچ زھرشانی کنوک گچینی جنین آدمانی سر ءَ پاکستانی مھترھند ءَ بے کچ ءَ زوراکی کرتگ ، مردمی دود ءُ راھبند پادمال کرتگ اَنت۔ بلوچ مات ، گھار ءُ کماشانی سر ءَ پاکستانی لٹ ءُ آزار دئی بلوچ راجی یاداشت ءِ بھر جوڑ بیتگ اَنت ءُ راجی یاداشت اِنت کہ راجی کردار ءَ ساچ ایت ، ایشی ءَ گْوستانک گْوش اَنت۔ چہ گْوستانک ءَ زبھریں پاکستان ناں چہ گْوستانک ءِ ارزشت ءَ سھی اِنت ءُ ناں چہ راجی یاداشت ءَ ۔ جھان گواہ اِنت کہ بلوچ بہ گندئے وتی کشندہ ءَ پھل بہ کنت بلے جنین آدم ءِ کم منگہ کنوک پھل کنگ نہ بیت ، راج دْرو پھل کنگ نہ بیت ، ایشی ءِ سزا گیش اتگ۔
ڈاکٹر نسیم ءَ گْوشتگ بلوچ جنین داشت ءُ ھاٹیگ ءِ چیدگ جوڑ بیتگ اَنت ، مئے مات ءُ گھاراں رسترے ءِ دیم ءَ دلیری ءُ بھادری ءِ انچیں دروے اشتگ کہ ناں ایوک ءَ بلوچ راج ، اے دمگ بلکیں سرجمیں جھان ءِ دودمانداریں مردم ایشی ءَ من اَنت ءُ منگہ دے اَنت۔بلوچ جنین آدمانی اے بے دروریں جھد مروچی ماں جھان ءَ پرمنگھیں چماں چارگ بیت۔ ایشی ءِ دیم پہ دیمی ءَ پنڈوکیں پاکستان ءِ کاسگ ھورک اِنت۔ اے مھترھند ایوک ءَ گوں وتی تانسرپنسدیں جھادی لشکر ءُ ایٹمی سلاھاں بہ گندئے دگہ چندیں سالاں جھان ءَ بلیک میل کرت بہ کنت بلے گْوستانکی راستی ءِ برپشت ءَ پاکستان ءِ باندات بلوچ راجی آجوئی ءِ زْرمبشت ءَ سھرا کرتگ ، نی ایشی ءِ مٹائینگ پدنہ بیتگیں کارانی تہ ءَ ھوار اِنت۔
