بلوچ راجی زرمبش ( بی این ایم ) ءِ جارکشءَ وتی شنگ کرتگیں درشانے ءَ گوشتگ کہ گلہ من وزیر پشتون راج ءُ سرزمین ءِ ارواہ ءِ چیھانٹ اَت، آئی ءَ چہ وتی لچہ کاری ءِ پارست ءَ پشتون ءُ اوگان راج ءِ تہ ءَ پہ سیاسی بیداری ءَ کار کرتگ۔ آ اوگان سرزمین ءِ پھکیں شیدا ءُ پشتون راج ءِ دل ستکیں راھشونے اَت۔
آئی ءَ گوشتگ کہ پاکستانی مھترھند ھر وھد ءَ کہ چہ وتی آمیدگس ءُ راھبندانی پارست ءَ کسے ءِ دارگ ءَ بے سوب بیت گڑا آئی ءَ گوں در آمیدگسی راھبنداں دیم پہ دیم بیت۔ گلہ من ءِ دارگ ءَ ھم پاکستانی مھترھند ءَ ھمے رنگیں پندلے کرتگ ءُ آ کشارینتگ۔
آئی ءَ گوشتگ کہ گوں گلہ من ءِ شھمیری ءَ دمگ چہ پرجوشیں ورنائیں آشوبی لچہ کارے ءَ زبھر بوت، بلوچ راجی زْرمبشت ( بی این ایم ) ءِ راھشون ءُ باسک پہ آئی ءَ ستا شانی کن اَنت ءُ اے تاوان ءِ سر ءَ گوں پشتون ءُ اوگان راج ، پشتون پان زْرمبشت ( پی ٹی ایم ) ءُ آئی ءِ کھول ءَ دلپدردی درشان اَنت۔
