بلوچ راجی زرمبشت ( بی این ایم ) ءِ بنجاھی کارگشاد دل مراد بلوچ ءَ ماں چاگردی رسانکدر ایکس ءَ پشتون آشوبی شائر گیلامن وزیر ءِ کوش ءِ درگت ءَ نبشتگ کہ دگہ یک پشتون ورنایے تھارونکیں راھاں جنگ بوتگ، دگہ یک پیریں پشتونے ءَ آئی زھگ ءِ لاش کوپگاں دیگ بوت۔ گیلامن وزیر یک آشوبی شائر ءُ مردمی ھکانی کارکنے۔
آئی ءَ گوشتگ کہ گیلامن وزیر یک آشوبی شائر ءُ مردمی ھکانی نہ ترسیں کارکنے بوتگ آئی پشتون سرڈگار ءِ سر ءَ پاکستان ءِ زوراکی ءُ لٹ ءُ پل ءِ بگیری ءَ توار چست کرتگ۔ چہ پشتون زبان ءَ سرپد بوگ ءَ ابید "جاوید امرکیل” ءِ توار ءَ گیلامن وزیر ءَ گوش داراں کہ چہ درد ءَ سریچ اِنت، پمیشکا کہ آئی سوتانی تہ ءَ وتن ءِ درد ءُ راستی گندگ بیت۔
دل مراد ءَ گوشتگ کہ گیلامن ءَ پشتونان ءَ زوراکی ءِ بگیری ءَ یکجاہ کرتگ ءُ ھمے میار سرزد بوتگ ءُ ریاست ءَ زور ءِ بنجاہ ( راستی ءَ راجانی سر ءَ زورگپتی ءِ بُندر ) اسلام آباد ءَ آئی سر ءَ ارش کرتگ ءُ ٹپانی گون ءَ مڑ اتگ گیلامن وزیر گڈی ءَ وتی شئیر ءُ آشوبی لیکہ یل داتگ اَنت ءُ دور شتگ، چہ اود ءَ کس واتر نہ بیت، کسے نہ۔
آئی ءَ گوشتگ کہ من بلوچ ءِ بستار ءَ درد ءِ اے گرانیں ساھتاں پشتون راج ءِ گماں یکچ ءَ شریدار آن ءُ گپ ایش اِنت کہ ایردستانی ھمک وھد ءَ رنجانی جتائیں کسھے بیت۔
دل مراد ءَ گوشتگ کہ وھد ھمیش اِنت کہ گر ءُ چیل ءُ دوریءِ راھانی تہ ءَ بھر ءُ بانگ بوگ ءَ ابید پہ پشتون سرڈگار ءَ دژمن ءِ زانگ، پہ مڑگ ءَ یکجاھی ءُ منزل گچین کنگی اِنت۔ اگاں نہ ما ھمے وڑ ءَ تھارونکیں راھاں جنگ بہ ایں، مئے ورنا بے موت ءَ مر اَنت ءُ مئے پیرمرد ورنایانی لاشاں کوپگ ءَ کن اَنت۔
