بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ شال ءَ زور بیگواھیں زھیر ءِ کھول ءِ زھرشانی روانک ءِ سر ءَ پولیس ءِ بیڑ برگ ءِ پژدر ءَ نبشتہ کرتگ کہ زھیر ءِ کھول ءِ نیمگ ءَ پہ آئی آجوئی ءَ گوستگیں یازدہ روچ اِنت کہ سریاب دگ شال ءَ زھرشانی نندانک برجاہ اِنت۔ مرچی یک روانکے کشگ بوتگ شال پولیس ءِ نیمگ ءَ پر ایمنیں زھرشانی ءِ جنین ءُ زھگ لٹ شاپ کنگ بوتگ اَنت ءُ پر ایمنیں زھرشانی کنوک دزگیر کرتگ اَنت۔
آئی ءَ گوشتگ کہ اے ریاست ھمے گپ ءِ سر ءَ سرجم ءَ ایمان کار ایت کہ ھمک جیڑہ ءِ گیش ءُ گیوار زوراکی اِنت۔ پیسر ءَ وتی راھبند ءُ کانوداں لگتمال کنت ءُ شھریاں زور بیگواہ کنت وھدے کہ آیانی کھول بے راھبند ءُ درکانودی گامگیج ءِ بگیری ءَ زھرشانی کن اَنت ءُ توار چست کن اَنت گڑا ریاست گپ ءُ تران ءُ جیڑہ ءِ گیش ءُ گیوار کنگ ءَ ابید جنین ءُ زھگانی سر ءَ گنتریں زوراکی کنت۔ آیاں دزگیر کنت۔ اگاں ریاست ھمے سرپد بیت کہ آ چہ زوراکیاں مردمانی توار ءَ دار ایت گڑا اے گوستانک ءِ سکا بلاھیں ردی یے کنگ ءَ اِنت۔
ڈاکٹر ماہ رنگ ءَ گوشتگ کہ من گوں بلوچ راج ءَ ھوار درسیں مردمانی گون ءَ لوٹ کن آں کہ زھیر ءِ کھول ءُ لس زھرشانی کنوکانی سر ءَ لٹ شاپ ءُ دزگیری ءِ بگیری ءَ توار چست بہ کن اَنت ءُ گوں آیاں ھمگام بہ بہ اَنت۔
