![](https://zrumbesh.com/wp-content/uploads/2024/07/WhatsApp-Image-2024-07-09-at-01.57.28_7aef155f-1024x549.jpg)
بلوچ آجوئی لوٹوکیں سلاہ بندیں گلانی ھم سنتیں گل بلوچ راجی آجوئی سنگر ( براس) ءِ جارکش بلوچ ھان ءَ ماں رسانکدر ءَ وتی درشانے ءَ گوشتگ کہ زورگریں پاکستانی لشکر ءِ نیمگ ءَ وتگڑیں لشکرکشی ازم استھکام ءِ بندات کنگ ءِ جار بلوچستان ءَ برجاھیں بلوچ چکچینی ءِ تیز کنگ ءِ جار اِنت۔ براس ءِ ھم سنتیں گل ھر پیمیں لشکری زوراکیانی بگیری ءَ وتی راج ءُ وتی سرڈگار ءِشریں وڑے ءَ دیمپانی ءَ کن اَنت ءُ زوراکیں لشکر ءَ پروش دے اَنت۔
جارکش ءِ دیمتر ءَ گوشتگ کہ بلوچستان ءَ لشکرکشی نوکیں گپے نہ اِنت، زورگریں پاکستانی لشکر چہ سال 1948 ءَ انچوش کہ چہ گوستگیں دھکاں بلوچستان ءَ لشکری زوراکی، چکچینی ءُ لشکرکشیاں ھوار اِنت۔ آئی مول بلوچ سرڈگار ءِ سر ءَ پاکستان ءِ زورگپتی ءِ برجاہ دارگ ءُ دراکش کنگ اِنت۔ ھمے لشکرکشیانی بگیری ءَ بلوچ پہ وتی راج ءُ سرڈگار ءِ پھریزگ ءَ سلاہ بندیں جھد کنگ ءَ اِنت۔ زورگریں پاکستانی لشکر ھما زوراکیاں لشکرکشی ءِ نام ءَ دیگ ءَ اِنت، چوناھا زورگپتی، لشکرکشی، زوراکی ءُ چکچینی اِنت۔ ھمے وڑ ءَ بلوچ سرمچار چہ دھکان پہ بلوچ راج ءُ وتن ءِ دیمپانی ءَ زورگریں لشکر ءِ گون ءَ مڑگ ءَ اِنت۔ ھمے وڑ ءَ اے درچ برجاہ داشتگ ءُ براس ءِ ھم سنتیں گل وتی کاراں شریں وڑے ءَ برجاہ دار اَنت ءُ وتگڑیں لشکرکشی ازم استھکام ءِ بگیری ءَ وتی راج ءَ پھریز اَنت۔
بلوچ ھان ءَ دیمتر ءَ گوشتگ کہ چہ سرمچارانی سوبمندیں ارش ءُ شونداتاں بلوچستان ءَ سی پیک ءَ ھوار چین ءِ درسیں لٹ ءُ پلی شوربندی بے سوب کُرتگ اَنت۔ پمیشکا بلوچستان ءَ چین ءِ چیرتر اِتگیں مالکاری ءِ پھازگ ءَ چین ءِ زور دیگ ءِ سر ءَ وتگڑیں لشکرکشی ازم استھکام ءِ جار جنگ بوتگ۔ دانکہ بلوچ چکچینی تیز کنگ، چین ءِ مالکاری ءُ لٹ ءُ پلی شوربندی پھریزگ بہ بنت۔ اے لشکر کشی پہ چین ءِ دلجم کنگ ءَ بندات کنگ بوگ ءَ اِنت کہ زورگریں پاکستانی لشکر بلوچستان ءَ چین ءِ مالکاری ءِ پھریزگ ءَ بلوچستان ءَ لاشانی مُچ کنگ ءَ چک ءُ پد نہ بیت۔
جارکش ءَ دیمتر ءَ گوشتگ کہ بلوچ راجی سنگر ( براس ) ءِ ھم سنتیں گل، وتگڑیں لشکرکشی اَزم استھکام ءِ بگیری ءَ وتی جنگ ءَ تیز کنگ ءِ جار ءَ جن اَنت۔ اے رد ءَ نہ تیوک ءَ زورگریں لشکر ءُ آئی شوربندی بلکیں چین ءِ سیتانی سر ءَ ھم ارش تیز کنگ بنت۔