شال: چہ آواران ءَ 12 جون 2024 ءَ پاکستانی لشکر ءِ دست ءَ زور بیگواہ کنگ بوتگیں دلجان ءِ کھول ءَ ماما کدیر ءِ ھمراھی ءَ شال پریس کلب ءَ پریس کانپریس کرتگ ءُ گوشتگ کہ بلوچستان یک کوشجاھے جوڑ بوتگ، مردم چہ آدگہ سھداراں گنتریں زندے ءِ گوازینگ ءَ لاچار اَنت۔ ھمک روچ زوریں بیگواھی ءِ کیس، ژانگولیں لاشانی دزکپگءَ بلوچستان ءِ مردم جانی ءُ سسائی نادراہ جوڑبوتگ اَنت۔ اے مزنیں جیڑہ ءَ مردمانی کوش ءُ زوریں بیگواھیانی سر ءَ مردمی ھکانی ٹاپار جنوک بے توار اَنت۔ چے بلوچستان ءِ جاہ منند مردم نہ اَنت؟ چے جھان ءِ کانود بلوچستان ءَ منگ نہ بیت؟ چے مردمی ھکانی ٹاپار جنوکیں گل ءُ سیاسی چاگردی ٹولی یا سرکار ءَ انچو زور ءُ واک نیست کہ آ زندگیں مردمانی کشگ ءِ بگیری ءَ ھچ وڑیں گامگیج زورگ ءَ نہ اَنت۔ چے بلوچستان ءِ مردم وتی سرجمیں زند ءَ گوں درد ءُ اندوھاں بہ گواز ین اَنت؟
آئی ءَ گوشتگ کہ کیچ بہ بیت یا بولان، کراچی بہ بیت یا ھب چوکی، آواران بہ بیت یا نوشکے، نسیر آباد بہ بیت یا ڈیرہ بگٹی، کوھلو کاھان بہ بیت یا ڈیرہ بگٹی بلوچانی زندمان سک جنجال اِنت ءُ ایشی آسر مئے شمےدرسانی دیم ءَ اِنت ما درسیں بلوچ وتی درد ءِ درمان ءَ سرپد بہ ایں پہ پریس کانپریس ءَ درکپ ایں دانکہ اھوالکار مئے توار ءَ داں ھما ادراھاں سر بہ کن اَنت کہ اے درد ءِ زمہ وار اَنت ءُ داں ھما مردماں سر بہ کن اَنت کہ مئے رنجانی باروا بے توار اَنت اے میارباری ءَ یکچ ءَ شریدار اَنت۔ بلوچستان ءِ ھمک مردم یک دردناکیں کسھے، کسے ءِ زھگ گار اِنت، کسے ءِ برات، کسے ءِ لوگواجہ کسے ءِ چم ءِ چراک سسائی نادراہ بوتگ ءُ پہ وتکشی کنگ ءَ لاچار بوتگ، ھما کہ مردماں زور بیگواہ کن اَنت ءُ زوریں بیگواگی ءِ زمہ وار اَنت آ زوراکی ءِ سر ءَ بے تواری ءِ کرد ءَ پیلو کنگ ءَ اَنت۔
آئی ءَ گوشتگ کہ بلوچستان ءِ دمگ آواران زوراکیانی منانکے اود ءَ ھمک روچ زوریں بیگواھی وتی گڈی آسر ءَ برجاہ اِنت۔ ھمے وڑ ءَپاکستانی لشکر ءِ ھپت گاڑیانی یک کاروانے 12 جون 2024 ءَ مئے گس تیرتیج ءَ آتکگءُ بیڑ برتگ مئے جگر ءِ ٹکر دلجان ء اللہ بکش ءَ مئے چمانی دیم ءَ آوار جتگ ءُ بیگواہ کرتگ کہ مرچی اے ویل ءَ بیست روچ ءَ گیش اِنت دلجان ءِ ھچ وڑیں ھال نیست۔ دلجان ءِ زوریں بیگواھی ءِ باروا سرکاری اگدہ دار گوشتگ اَنت آ مرچ باندا ءِ دروگیں دلبڈی ءَ دیگ ءَ اَنت ھمے سوب ءَ ما سکا رنجانی دیمپان ایں۔ یک کھولے ءِ چم ءِ چراگ ءِ بیگواھی سکا دردناک اِنت ھمے رنج ءَ مارا سسائی نادراہ کرتگ۔
آئی ءَ گوں اھوالکاراں دلگوش کرتگ ءُ گوشتگ کہ ما شمئے پارست ءَ گوں درسیں مردماں لوٹ کن ایں کہ دوشمبے ھشت جولائی ءَ ھزدار ءَ شال کراچی شھدگ ءَ زھرشانی بند کن ایں گوں مردماں ھمے لوٹ ءَ کن ایں کہ آ مئے درد ءَ سرپد بہ بنتءُ اے زھرشانی ءَ بھر بزور اَنت دانکہ مئے جگر ءِٹکر پہ سلامتی گس ءَ سر بیت ءُ مارا ایمنی نسیب بہ بیت۔ ما شمئے پارست ءَگوں مزنیں اگدہ داراں لوٹ کن ایں کہ پہ دلجان ءِ آجوئی ءَ وتی مردمی کرد ءَ پیلو بہ کن اَنت۔
آئی ءَ گوشتگ کہ من وتی پریس کانپریس ءِ گڈی ءَ ھمے گوشگ لوٹ آں کہ اگاں دلجان آجو نہ بوت ما وتی زھرشانی ءَ دراجکش کن ایں۔
