![](https://zrumbesh.com/wp-content/uploads/2024/05/WhatsApp-Image-2024-05-21-at-00.39.22_9cca64b0-1024x576.jpg)
بلوچ اسٹوڈنٹس ایکشن کمیٹی گْوادر ھنکین ءِ آرگنائزنگ باڈی دیوان گل ءِ بُنجاھی پتر ءِ باسک سنگت بالاچ ءِ سروکی ءَ برجم دارگ بوتگ۔ دیوان ءِ گچینی بنجاھی پتر ءِ باسک سنگت پوزیہ، سلیم ءُ آمر بوتگ اَنت۔ دیوان ءَ جتائیں بُنگپ کہ آیانی تہ ءَ بنجاھی سرکیولر، گل ءِ کار ، ھندی ءُ میان استمانی سیاسی جاورانی سر ءَ گوں دلجمی ءَ باوست ءَ پد آؤکیں گامگیج ءِ تہ ءَ پہ گْوادر ھنکین ءِ آرگنائزنگ باڈی ءَ سنگت گچین کنگ بوتگ اَنت۔
بنجاھی سنگتاں تران کناں ءَ گوْشتگ کہ گوادر ھنکین ءِ جوڑ بوگ پہ بلوچستان ءِ تیاب دپی دمگاں نیکیں پالے۔ گوادر کہ میان استمانی کاروبار ءِ بنجل زانگ بیت بلے بژنی گپ ایش اِنت ھمے شھر ءِ تہ ءِ جاہ منندیں ورنا جتا جتائیں جیڑہ ءُ جنجالانی آماچ اَنت چوشکہ نشہ ءِ وڑیں سِلکاری، وانگی ادارھانی بندی ءُ کمی، یا کسان امری ءَ مالی جیڑھانی سبب ءَ چہ وانگ ءَ سدگ وتی تہءَ مزنیں تاوان اَنت۔ اے سرجمیں جیڑھانی سرپد بوگ ءَ پد نودربر گل ئے ءِ بستارءَ مئے راجی زمہ واری بیت کہ ما ایش جیڑھانی دیم ءَ بہ اوشت ایں ءُ پہ وتی ورناھاں سیاسی ءُ زانشتی چاگردے جوڑ کنگ ءِ جھد بہ کن ایں۔
دیمتر ءَ دیوان ءَ ساڑی ئیں سنگتاں تران کنان ءَ گوشتگ کہ مزنیں مدتے بیت گْوادر ءَ نودربر سیاست جتائیں پندلانی بنیات ءَ اوشت آماچ کنگ بیتگ ءُ گْوادر ءَ راجی ادارھانی دیم ءَ وڑ وڑیں جیڑہ ءُ جنجال آرگ بوتگ اَنت کہ چہ آیانی سبب ءَ نودربر ءُ ورنا وتی راجی زمہ واریاں گستا بوتگ اَنت بلے چہ گوستگیں سالاں بساک ءِ مُدام جھد بوتگ کہ وتی پروگرام ءَ داں اد ءِ ورناھاں سر بہ کنت۔ ادارہ ءِ سنگتانی مزنیں جھدے ءَ پد مروچی بساک گْوادر ھنکین جوڑ کنگ بیتگ، نی ادارہ وتی مھکمیں گوں پروگرام ءَ اے جھد ءَ کنت کہ گْوادر ءِ ورناھانی وانگی ءُ پگری ھیلکاری ءَ بہ کنت ءُ گْوادر ءِ تہ ءَ شریں وانگی چاگردے بہ ٹھین ایت داں اد ءِ ورنا ءُ نودربر وتی راجی زمہ واریاں سرپد بہ بنت ءُ بلوچ جُنز ءِ بھر بہ بنت۔
جتائیں بُنگپانی سرءَ گوں دلجمی ءَ تران ءَ پد دیوان ءِ گُڈی بُنگپ آؤکیں گامگیج ءِ تہ ءَ پہ آرگنائزنگ باڈی ءَ سنگت گچین کنگ بوتگ اَنت۔ نوک گچین بیتگیں کابینہ ءَ شاہ جان کماش، ولید کمک کماش ھنیپ، چاکرءُ سمیر آرگنائزنگ باڈی ءِ باسک گچین کنگ بوتگ اَنت۔
دیوان ءِ گُڈی بھر سوگندی بھر بوتگ کہ بُنجاھی سنگت ءَ نوک جوڑ بوتگیں ھنکین ءِ سنگت سوگند داتگ اَنت ءُ آئی ءَ پد دیوان ءِ ھلاسی ءِ جار جنگ بوتگ۔