![](https://zrumbesh.com/wp-content/uploads/2024/06/1000383338-1024x629.jpg)
بلوچ وومن پورم پنجگور ھنکین ءِ آرگنائزنگ باڈی دیوان بُنجاھی کماش ڈاکٹر شلی ءِ سروکی ءَ برجم دارگ بوتگ ، دیوان ءِ گچینی مھمان ءِ بُنجاھی پتر ءِ باسک شھناز بلوچ بوتگ۔ دیوان ءِ بُن گپ بنجاھی سرکولر، گل ءِ کار ،ھندی ءُ میان اُستمانی سیاسی جاور ءُ آؤکیں گام گیج بوتگ اَنت۔
دیوان ءِ بندات ءَ سںنگتاں وتی پجّار کرتگ، بُنجاھی سنگتاں بنجاھی سرکولر ونتگ ءُ گل کار ءِ تہ ءَ آیاں تران کنان ءَ گوشتگ کہ ما یک انچیں استانے ءَ زندگی کنگ ءَ ایں کہ بیست ءُ یکمی کرن ءَ بلوچ چہ ھر وڑیں آسراتی ءَ چہ زبھر کنگ بوتگ اَنت ،ھمے رنگ ءَ اگاں ما وانگی نزام ءَ بہ چاریں بازیں ھند ءُ دمگاں مارا وانگجاہ ھچ گندگ ءَ نہ ایت اگاں وانگجاہ ھست اَنت گڑا ریاستی مردماں وتی زاتی بیٹک جوڑ کرتگ اَنت ءُ بازیں جاہ ءَ وانگجاہ ھست بلئے ٹیچر نیست اگاں ٹیچر کاینت گڑا یا وت گُد دوچی کن اَنت یا کہ گونڈواں وتی گُدانی دوچگ پرما اَنت ءُ بازیں میتگاں نام ءِ وانگجاہ ھست اَنت، ءُ ھمے بازیں جیڑہ ءُ جنجالانی سوب ءَ گیش چُک چہ وانگجاھاں زبھر اَنت ءُ گیشتر کہ جنکیں گُنڈو ھست اَنت آ وانگجاھاں وانگ ءَ نہ اَنت ، تنیگ ءَ سرکار ءِ نیمگ ءَ چوشیں گامگیج زورگ نہ بوتگ کہ آ وانگی نزام سرا بلوچستان ءَ شریں وڑے ءَ کار بہ کنت۔
آئی ءَ گوشتگ کہ مئے شمے زمہ واری اِنت کہ ما اے جیڑہ ءَ گیش ءَ چہ گیش دیم ءَ بیار ایں ءُ دانکہ بلوچ ءِ باندات چہ وانگ ءَ زبھر مہ بیت ۔ دومی کہ جیڑہ ھست اَنت بلوچستان ءِ تہ ھیلتھ پیسلیٹیز نہ بوگ ءِ برابر اِنت ءُ ھمے سوب ءَ بازیں جنین ھست اَنت کہ آ چُک ءِ سرا مرگ ءِ ارجاں بنت ءُ بلوچستان ءِ تہ ءَ Mortality rate سک باز اِنت ، دگہ مزنیں جیڑہ ایش اِنت کہ بلوچستان ءِ تہ شومک ءِ نادراھجاہ نیست ءُ نا کہ Equipment ھست گیشتر شومک ءِ نادراھیں مردم درمان نہ بوھگ ءِ سوب ءَ مِرَگ ءَ اَنت ۔
آئی ءَ گوشتگ کہ بلوچ ءِ انوگیں مستریں جیڑہ سر کشگ ءَ اِنت آ گار ءُ بیگواھی ءِ جیڑہ اِنت ، بلوچستان ءِ تہ ءَ چوشیں روچے نہ گوز ایت کہ کسے بیگواہ نہ بیت ، انو بلوچ ءِ گار ءُ بیگواھی ، بلوچ ءِ چکچینی گوں ترندی ءَ برجاہ اِنت گار ءُ بیگواھی ءِ تہ ءَ گیش جنین سفر کنگ ءَ اَنت ،گس ءِ تہ ءَ اگاں کسے گار ءُ بیگواہ بیت گڑا پہ آئی توار چست کنوک ھمے جنین اَنت ، سکیانی دیمپان ھمے جنین اَنت ، وتی گار بیگواھیں کس ءُ آزیزانی آجوئی ءِ جھد ءِ سپر ءَ وتی جند ءِ پجار ءَ ھم گار کنت ۔
آیاں دیمتر ءَ تران کنان ءَ گوشت کہ پَنجگُور ءِ تہ ءَ مُلا ازم سک باز اِنت وانگجاہ ءَ چہ گیش مسیت جوڑ کنگ بوتگ ، اسلام ءِ نام کارمز کنگ بوگ ءَ اِنت اے درست ریاستی مردمانی سازیتگیں پندل اَنت کہ بلوچ وانگ ءُ زانگ ءِ پڑا دیم ءَ مروت ، بلوچ ءِ تہ ءَ سوچگ ءِ سنچ مہ بیت ، ھمے کہ مُلا ھست اَنت آ گوش اَنت کہ جنکانی وانینگ ھراب انت ، جنک آ مراگشاں مَر اَنت اود ءَ مردین ھست ، اے درست وتگڑیں باوست اَنت کہ ریاست ءِ نیمگ ءَ چہ پیداک کنگ بوگ اَنت ، مارا شمارا اے چیز ءِ سر ءَ کار کنگی اِنت ریاستی داتگیں ھمک سوچ پروش دیگی اِنت ۔دومی پنجگور ءِ تہ ءَ کشندہ ٹولی تچکی ءَ مردماں جنگ ءَ انت ءُ آیانی لوگ ءِ تہ ءَ دور کنگ اَنت، انوگیں ویل مئے دیم ءَ اِنت کہ ابدالباسد ءِ لوگ ءَ ایشاں دور کُت آئی جند شھید کنگ بوت ءُ آئی زال ٹپی بوت، پہ اے وڑیں چیزانی دیم ءَ دارگ ءَ مارا گراؤنڈ ورک کنگ لوٹ ایت لس بلوچ ءَ ھوار جنین ءِ ھمینچو ھیل دیگی اَنت کہ آ وتی سرا بیوکیں ھمک ریاستی ءُ چاگردی زوراکیانی بگیری ءَ توار چست بہ کنت ۔
آؤکیں گام گیج ءِ تہ ءَ بلوچ وومن فورم پنجگور ھنکین جوڑ کنگ بوتگ نائید کماش ، ھالدہ کمک سرکماش ءُ شازیہ ،مریم ءُ جوریہ باسک گچین کنگ بوتگ اَنت۔