بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ میھی، مشکے ءِ شیھداں کہ 30 جون 2015 ءَ زوگریں پاکستانی لشکر ءِ زوراکیانی بگیری ءَ انچوش کہ گوں گھگیری ءُ جوانمردی ءَ جنگ داتگ،گْوستانک ءِ تاکدیماں گوں گچینی دانکاں یات کنگ بنت۔ چہ شھیدانی ھمے دیمونیانی برورد ءَ مرچی بلوچستان ءِ ھمک کُنڈ ءَ پاکستانی زورگری ءِ بگیری ءَ مردم جُھد ءَ باسما بیگ ءَ اَنت۔گْوستانک اے کِرداں یات کنت کہ آیاں وھد ءِ بنیاد ءَ پہ بلوچ راج ءُ سرڈگار ءِ دیمپانی ءَ وتی جان ندر کُرتگ اَنت۔
آئی ءَ گوشتگ کہ بلوچ راجی آجوئی زْرمبشت ھمے شھیدانی دیمونیانی برورد ءَ برجاہ ءُ توانمند اِنت۔ چہ شھیدانی گرانبھائیں دیمونیاں راج باسما بیتگ ءُ بلوچستان ءِ تہ ءَ زورگیر ءَ داں ھما وھد ءَ دم کشگ ءَ نیل ایں داں کہ آ چہ زمین ءَ نہ تچ ایت، یات کنگی اِنت کہ زورگر مدام ھنچوش کنت کہ مرچی بلوچستان ءَ پاکستان ءِ ریاست کنگ ءَ اِنت،کشت ءُ کوش،زور بیگواھی ءُ ژانگولیں لاشانی چگل دیگ ءِ زوراکیاں ھوار انت۔
جارکش ءَ گوشتگ کہ میھی، مشکے ءِ شھید میجر سلیمان پنام شیھک جان،ذاکر جان، رمزان بلوچ، گاجیان بلوچ،آلم ھان، رپیک بلوچ، پرھاد بلوچ، انیس بلوچ،ھدانزر بلوچ، پیسل بلوچ، زاھر بلوچ ءُ واجہ سپر ھان بلوچ راج ءِ ھما گرانبھائیں بچ اَنت کہ آیاں گوں جوانمردی ءَ پاکستانی زورگری شونداتانی بگیری ءَ گھگیری ءِ راہ گچین کُرتگ ءُ سرڈگار ءِ آجوئی ءَ جنگ داتگ ءُ وتی جان ندر کُرتگ اَنت۔ شھیدانی ھمے گرانبھائیں دیمونی ٹک ءُ دمگاں درکپتگ ءُ راجی جھد ءِ بھر بیگ ءُ پہ آئی ءِ مھکم کنگ ءَ مردم ءَ سکین دیگ ءَ اَنت۔ بلوچستان ءِ شھیداں وتی گرانبھائیں جان ندر کُرتگ اَنت داں کہ بلوچ راج آجوئی ءُ پُر ارزشتیں زندگی یے بہ گوازین ایت۔شھیدانی ھمے گرانبھائیں دیمونی ءُ جوزگ دیم ءَ برگ ءُ راجی زْرمبشت ءِ گیش مھکم کنگ ھژدری اِنت۔
آئی ءَ گوشتگ کہ میھی ءِ شھیدانی نھمی سالروچ ءِ درگت ءَ ما شھیداں ستک شانی ندر کنیں کہ راجی بچاں وتی جان ندر کُرتگ اَنت ءُ راجی آجوئی ءِ راہ مارا نشون داتگ۔ بلوچ راج مرچی اے وھد ءَ پاکستان ءِ وڑیں بے شرپ ءُ زوراکیں ریاستے ءِ دیمپان اِنت کہ ھمک روچ بلوچ راج ءِ بگیری ءَ کھر گْوار ایت۔ مرچیگیں جاور ھمے لوٹ ءَ کنت کہ بلوچ ورنا جُھد آجوئی ءِ بھر بہ بنت ءُ ایشی ءَ مھکم بہ کن اَنت ءُ دیم ءَ بہ بر اَنت چے ءَ کہ یک آجوئیں بلوچستانے بلوچ راج ءِ گھتریں بانداتے ءِ مانزان بوت کنت۔
میججر گھرام ءَ گوشتگ کہ بی ایل ایپ ندر بیتگیں سرمچارانی گرانبھائیں دیمونیاں ستاشانی ندر کنت ءُ شھیدیں ھمبلانی واھگ ءُ لوٹاں بلوچستان ءِ آجوئی ءِ واب ءَ سرجم کن ایں۔
