کراچی: داکٹر دین مھمد ءِ زوریں بیگواھی ءِ پانزدہ سال سرجم بوگ ءَ سمی دین ءَ ماں کراچی پریس کلب ءَ پریس کانپریس کرتگ ءُ گوشتگ کہ زوریں بیگواھی مردمی ھکانی باروا یک سکا مزنیں جیڑھے، بلوچستان ءُ پاکستان ءَ گنتریں وڑے ءَ برجاہ اِنت۔ زوریں بیگواھی ءِ لڑ روچ پہ روچ دراجکش بوگ ءَ اِنت۔
آئی ءَ گوشتگ کہ منی پت ڈاکٹر دین مھمد ءَ ریاستی ادارھانی دست ءَ زوریں بیگواھی ءَ پانزدہ سال سرجم بوتگ، منی پت بلوچستان ءِ دور ءُ پدمنتگیں ھند اورناچ، ھزدار ءَ وتی سرکاری کار ءَبوتگ ھمے میان ءَ سادگ پوشاکیں چیریں ادارھانی کارمنداں درکانودی آوار جتگ ءُ بیگواہ کرتگ۔ پانزہ سال ءِ گوزگ ءَ پد ھم داں مرچی مارا آئی باروا ھچ وڑیں ھال نہ رستگ۔ منی پت چہ ھما جاہ ءَ آوار جنگ بوتگ اود ءَ نزیک ءَ پولیس گسے ھم ھست، پاکستانی لشکر ءِ بنجلے ھم ھست۔ منی پت وت یک سرکاری نوکرے آمیدگس ءُ ریاستی ادارھانی سر ءَ پرزبیت پہ منی پت ءِ آجوئی ءَ وتی کرد ءَ پیلو بہ کن اَنت بلے چہ ایشی ءَ ابید آ انگت ءَ مارا مدام دلسیاہ کنگ ءَ اَنت، پہ وتی پت ءِ آجوئی ءَ ما مدام آمیدگسءَ شتگ ایں، 2016 ءَ آمیدگس ءَ منی پت ءِ کیس ھلا س کرتگ ءُ گوشتگ کہ ڈنی ڈیھے ءَ شتگ یا باگیانی بنجلاں اِنت۔ بلے ما اے گپ ءَ نہ من ایں، آمیدگس ءِ وڑیں مزنیں ڈیھ ءِ ادارھے ءَ اے گپ زانگ لوٹ ایت، بلے چہ ایشی ءَ ابید ما ڈیھ ءِ ادارھانی شرپ ءَ کن ایں کمیشناں پیش بہ ایں، کمیشن مدام چپ ءُ چوٹیں جست گر اَنت ءُ مارا ترسین اَنت مارا انچوش ترسین اَنت کہ ما پہ چہ وتی پت ءِ کیس ءَ دزکش بہ بہ ایں۔
آئی ءَ گوشتگ کہ ما اے ڈیھ ءِ پرایمن ءُ راجمستری ءِ منوگریں شھرمنندی ءِ بنیاد ءَ اے ڈیھ ءِ درسیں ادارھانی در ٹک اتگ اَنت۔ ڈیھ ءِ آمیدگس ءِ نزام ءِ سر ءَ بروسہ کرتگ ءُ آمیدگس ءِ نیمگ ءَ برجاہ داشتگیں کمیشناں پیش بوتگ ایں، زھرشانی ءِ درسیں وڑ ءُ پیم کارمرز کرتگ اَنت۔ اے پانزدھیں سالاں منی پت ءِ جتائی ءَ مئے سرجمیں کھول سانمند کرتگ ءُ مئے کھول سکا جنجالانی دیمپان اِنت۔ ڈاکٹر دین مھمد ءِ پت، گھارءُ برات ھمے پانزدھیں سالانی تہ ءَبیران بوتگ اَنت، آ داں وتی زندگی ءِ گڈی دمان ءَ ھمے ودار ءَ بوتگ اَنت کہ ما وتی آزیز ءَ بہ گنداں، اے درد ءِ انچیں کسہ اَنت کہ آیاں ما گوشت نہ کن آں۔ من، منی برات ءُ گھار ءَ ریاست ھمے گپ ءَ دلجم کناھینگ لوٹگ ءَ اِنت کہ مارا چورہ بہ گوش ایت بلے ما زندگیں پتے ءِ چک ایںءُ یک روچے مئے زندگی واتر کیت، منی مات ءَ ھمے گوشگ بہ بیت کہ آ داں انوں دین جان ءِ لوگبانک اِنت یا جنوزام بوتگ۔ ما چہ ریاست ءَ اے جستانی پسو ءِ ھک ءَ دار ایں۔ اے پانزدھیں سالانی تہ ءَ ما سے بر ءَ اسلام آباد ءَ شتگ ایں ءُ زھرشانی کرتگ ءُ نشتگ ایں، مارا بس دروگیں دلبڈی دیگ بوتگ ، گڈی رند ءَ ریاستی ادارھانی زمہ وار یا سرکاری مردم پہ مئے دروگیں دلبڈی دیگ ءَ ھم نہ یتکگ اَنت، بلکیں اسلام آباد سر بوگ ءَ مارا گوں لٹاں وش آتک کرتگءُ سردیں آپ اِش سر ءَ رتکگ۔ مارا زنداناں بندیگ کرتگ ءُ چہ اسلام آباد ءَ کشگ ءِ چن ءُ لانچ کرتگ۔ ما گوں آدگہ زور بیگواھیں مردمانی کھول ءِ ھواری ءَ وتی ایمنیں جھد برجاہ داشتگ۔ ما وتی سبر ءِ سر داشتگ۔ چہ ایشی ءَابید مارا گوں جتائیں ھیلھاں دلسیاہ کرتگ۔
سمی دین ءَ گوشتگ کہ منی سادگیں جستے کہ ریاست ءِ نیمگ ءَمنی پت ءِ سر ءَ چونیں مزنیں بھتامے کہ آ ڈیھ ءِ آمیدگس ءَ پیش کنگ نہ بیت۔ اد ءَ مزن مزنیں میار بار ھم دیم ء َ آرگ بنت۔ ریاست ءَ منی پت ءِ زوریں بیگواھی ءِپسو دیگ لوٹ ایت۔ ڈاکٹر دین جان زندگ اِنت یا کہ ھمے بندیگجاھانی آزارانی میان ءَ شھید بوتگ۔ ریاست ءَ سنگین بوگ ءُ مارا گوشگ لوٹ ایت۔ اے گپ ءِ زانگ مئے بنیادی ھک اِنت ماہ چہ پانزہ سالاں یکشل ءَ آمیدگس ءُ کمیشناں روگ ءَ ایں بلے چہ بے اوستی ءَ ابید دگہ ھچ نہ رستگ۔ بلے ما چہ وتی جھد ءَ بے اوست نہ بوتگ ایں، ما داں میان استمانی انساپ ءُ مردمی ھکانی ادارھاں وتی پریاد برتگ ءُ ھمے اوست ءَ دار ایں کہ یک روچے الم اے درسیں ادارھان جست گر اَنت کہ ھما مردم زوریں بیگواھی ءِ میار ءَ شریدار اَنت۔
آئی ءَ گوشتگ کہ زوریں بیگواھی ءِ اے دردناکیں جیڑہ ءِ دارگ ءُ زور بیگواھیں مردمانی پدجنگ ءِ اے جھد ءَ ما تیوک ءَ مڑ اِت نہ کن ایں مارا شمئے اھوالکار، مردمی ھکانی کارکن، سیاسی ءُ چاگردی کارکنان ھوار ھمک بھرگاں سیادی داروکیں مردمانی کمک درکار اِنت۔ من گوں زندمان ءِ ھمک بھرگاں سیادی داروکیں مردماں لوٹ کن آں کہ آ بیا اَنت ءُ مئے اے جھد ءَھوار بہ بنت۔ منی پت ءِ زوریں بیگواھی ءَ مرچی پانزہ سال سرجم بوتگ اے پانزدھیں سال ما گون رنجاں گوزینتگ اَنت۔ ما وتی کسانی ھمے دگانی سر ءَ گوازینتگ،ما چہ وتی جند ءِ ھنکین ءَ لڈینگ بوتگ ایں ھمے اوست دل ءَ بستگ کہ یک نہ یک روچے الم منی پت واتر کیت۔ بلے انچوش سال گیش بوان اَنت ءُ ھمے وڑ ءَ مئے ترس گیش بوان اَنت۔ ما یکبرے پد ءَ سادگیں پسوے لوٹ ایں ، آ ئی ءَ گوشگ لوٹ ایت کہ منی پت ڈاکٹر دین مھمد زندگ اَنت یا شھید کنگ بوتگ۔
سمی دین ءَ گوشتگ کہ زوریں بیگواھی ءِبگیری ءَ اے جھد ءَما یا زور بیگواھیں مردمانی کھول ایوک ءَ مڑ اِت نہ کنت پہ ایشی مارا شمئے درسانی کمک درکار اِنت، اے مردمگری ءِ پدریچ ءِ جیڑہ اِنت بیا اِت پدریچ ءُ زندگی ءِ جنگ ءَ مئے گون ءَ کمک بہ کن اِت۔
