بی این ایم ءِ رسانک ءُ ربیدگی کارگشاد کازی داد مھمد ریھان ءَ گوگل رجانک ءِ تہ ءَ بلوچی ءِ ھوار کنگ ءِ سرءَ وشی درشان کرتگ ءُ رجانکانی شر کنگ ءَ کمک ءِ پیشکش کرتگ۔
اے درشان بی این ایم ءِ وتی چاگردی رسانکدر ءِ اکاؤنٹانی تہ ءَ شنگ کنگ بوتگ، آ اود ءَ کازی ریھان ءَ گْوشتگ: ’’گوگل رجانک ءِ تہ ءَ بلوچی زبان ءِ گیش کنگ ستا کرزیں گامگیجے، ءُ پہ اے کار ءَ ما گوگل ءِ تورواں سر بار ایں، بلوچی کْوھنیں زبانے کہ ایشی ءِ دانک دگہ زبانانی تہ ءَ دست کپ اَنت۔ اے یک زندگ ءُ دْرپشناکیں زبانے کہ بازیں ڈیھاں گپ جنگ بیت ءُ گوں نوکیں زمانگ ءَ ھمدپ بیگ ءَ ایشی ءِ ندانک ءُ نبشتہ رھبند ءِ تہ ءَ گوں تیزی ءَ دیمروئی بیگ ءَ اِنت۔‘‘
آئی ءَ گیش کرتگ: ’’بے شک بلوچی زبان ءِ گوگل رجانک ءِ تہ ءَ ھوار کنگ ماں دامگی جھان ءَ پہ بلوچی زبان ءَ آشوبی دیمروئی یے”۔
کازی ریھان ءِ گْوشگ ءِ رد ءَ ’’ گوگل ءَ بلوچی رجانک ءِ کوالٹی چہ آ دگہ زباناں باز شرتر اِنت کہ بنداتی روچاں رجانک بیتگ اَنت اگاں کہ بلوچی باز رند ءَ گیش کنگ بوتگ بلے رجانک ءِ کوالٹی ایمن کنوک اِنت۔‘‘
آئی ءَ دیمترا گْوشتگ: ’’ بی این ایم ءِ رسانکدری تک وتی درشاناں یکیں وھد ءَ شش زباناں رجانک کنت کہ آھانی تہ ءَ براھوئی، بلوچی، انگریزی، اردو، پارسی، ءُ تازی ھوار اَنت۔ ما پہ بلوچی زبان ءِ دیمروئی ءُ گوگل ءِ تہ ءَ رجانکاری ءِ گھتر کنگ ءَ کار کنوکیں تْرامگیجان ءُ گوگل ٹرانسلیٹ کاربولک ءَ ھمک رنگیں کمک ءُ پیشکش کن ایں ۔ چہ ایشی ءَ بلوچی زبان ءِ ھستیں درائیں دْروشمانی دگہ زبانانی تہ ءَ رجانک کنگ آسان بیت، پرچا کہ ھرچ دمگ ءِ نبشتہ کار ءُ مردمانی درشانداب جتا اَنت ما باید اِنت کہ ما بلوچی ءَ وتی راست ءُ ھستیں درسیں دروشم ءَ دیم ءَ بہ یار ایں، چوش کہ بلوچی مزنیں دمگے ءَ گپ بیت۔”
کازی ریھان ءَ اے آئی ٹیکنالوجی ءِ ہم گپ جتگ کہ آئی ءَ اے کار الم کرتگ ءُ دامگ ءِ سر ءَ بلوچی نبشتہ کارمن اتگ اَنت ، آئی ءَ گْوشتگ: ’’ اے درگت ءَ ما آشوبی اے آئی ٹیکنالوجی ءِ ھم منت وار ایں کہ آئی ءَ پہ گوگل ءَ اے کار آسان کتگ۔ اے دیمروئی بلوچی زبان ءِ شنگکار ءُ مدامیں بلوچی نبشتہ کارانی پد ءَ بوتگ۔ اے کار مردمے ءِ کرتگیں نہ اِنت چوش کہ گوگل ءَ گْوشتگ کہ آھاں اے آئی ءِ کارمرد کرتگ ءُ گوگل ٹرانسلیٹ ءِ تہ ءَ 100 زبان گیش کرتگ۔ اے آئی ءِ زمانگ ءَ جھانی میتگ ءِ شھرمنندان ءُ وتی دگرگونیں جوانیں دود ءُ ربیدگ گلدستگ ءِ رنگ ءَ پیش دارگ ءِ کار ءَ آیگ ءَ اَنت بے شک ءَ گوگل ٹرانسلیٹ ءِ تہ ءَ بلوچی زبان ءِ ھوار کنگ پہ بلوچی زبان ءَ ڈیجیٹل جھان ءَ آشوبی دیمروئی یے۔”
