بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ وتی شنگ کرتگیں تامربندے ءَ گوشتگ کہ منی پت ڈاکٹر دین مھمدءَ 28 جون 2009 ءَ شپ ءَ چہ نادراھجاہ ءَ پاکستانی چیریں ادارھانی کارمنداں آزار دیگ ءَ پد آوار جتگ ءُ بیگواہ کرتگ۔ مارا انگت ءَ گوشگ نہ بوتگ کہ آ چون ءُ کج ءَ اِنت۔
آئی ءَ گوشتگ کہ اے پانزہ سالاں پہ پت ءِ سلامتی ءُ زندگی ءِ باروا زانگ ءَ منی گون ءَ ھوار منی کھول ء آدگہ ِ مردماں ھرپیمیں جھد کرتگ مارا انگت ءَ ھچ وڑیں سرپدی دیگ نہ بوتگ۔ اے میان ءَ باز سرکار مٹ بوتگ آیاں منی پت ءَ ھوار پہ آدگہ مردمانی آجوئی ءَ دلجمی داتگ بلے ھمک وھد ءَ آیانی دلبڈی دروگ بوتگ اَنت۔
سمی دین ءَ گوں اھوالکار ءُ رسانکدری کارکناں بھر زورگ ءِ لوٹ کرتگ ءُ گوشتگ کہ منی پت ءِ دراجکش ءُ دردناکیں زوریں بیگواھی ءَ پانزہ سال ءِ سرجم بوگ ءَ کراچی پریس کلب ءِ دیم ءَ بیگاہ ءِ چار ءُ نیم ءَ من پریس کانپریس کن آں۔ باندا رسانکدر ءِ تندجاہ ایکس ءَ تکشامے برجم دارگ بیت شپ ءِ ھپت ءَ داں دوازدہ ءَ #ReleaseDrDeenMohammad ءَ کارمرز بہ کن اِت۔
