پسنی: زور بیگواھیں نودربر بھادر بشیر ءِ کھولءِ زھرشانی نندانک ءِ سر ءَ پاکستانی لشکر ءَ بیڑ برتگ ءُ مردم لٹ شاپ کرتگ اَنت۔ زور بیگواھیں بھادر ءِ برات ءَ ھوار بازیں جنین ءُ زھگ ھم ٹپی بوتگ اَنت۔
اھوالکار ءِ رد ءَ مرچی سھب ءَ پاکستانی لشکر ءَ پسنی ءِ دوراھی ءَ پہ زور راہ ءِ پچ کنگ ءِ جھد ءَ گون مردماں زوراکی کرتگ ءُ لٹ شاپ ءِ ھواری ءَ آیانی موبائل ھم پل اِتگ اَنت۔ پاکستانی لشکر ءَ پہ نادراھی ءِ گوازینگ ءَ نیمون کرتگ۔
رسانکدر ءَ شنگ بوتگیں تامربنداں ھمے گندگ بیت کہ کھول گوشگ ءَ اِنت اگاں نادراھے ھست گڑا مارا پیش بدار ما گوازینان ئے بلے پاکستانی لشکر آیانی سر ءَ بیڑ بارت ءُ موبائلانی پلگ ءِ جھد ءَ کنت ءُ مردماں لٹ شاپ کنت۔
یات بہ بہ اِت کہ زور بیگواھیں بھادر بشیر ءِ کھول ءَ مرچی دو روچ بوتگ کہ پسنی زیروپوانٹ ءَ زھرشانی ءَ نشتگ اَنت۔
