![](https://zrumbesh.com/wp-content/uploads/2024/06/WhatsApp-Image-2024-06-26-at-06.33.09_c7d24efb-1024x594.jpg)
پسنی: دو روچ پیش پاکستانی چیریں ادارھانی دست ءَ زور بیگواہ کنگ بوتگیں نودربر بھادر بشیر ءِ کھول ءَ زھرشانی کرتگ ءُ پسنی زیروپوائنٹ ءَ مکران شھدگ بند کرتگ۔ زھرشانی ءَ نودربر، جنین ءُ زھگاں بازیں کچے ءَ بھر زرتگ۔
دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک بوتگ اَنت ءُ مساپر سکا جنجالانی دیمپان بوتگ اَنت۔
زھرشانی کنوکیں مرمانی گوشگ اِنت کہ بھادر بشیر کراچی زانشتجاہ ءِ نودربرے 23 جون ءِ بیگاہ ءَ چہ پسنی ءَ آوار جنگ ءُ بیگواہ کنگ بوتگ کہ انگت بیگواہ اِنت۔ 24 جون ءَ آئی زوریں بیگواھی ءِ بگیری ءَ زھرشانی کنگ بوتگ ءُ زھرشانی جاہ ءَ واکدار ءَ دلجمی داتگ کہ داں دو روچ ءَ شمئے زھگ یل کنگ بیت دو روچ ءِ گوزگ ءَ پد آئی ھچ وڑیں ھال نیست واکدار ءَ وتی کول پیلو نہ کرتگ اَنت ما پمیشکا زھرشانی کنگ ءَ ایں۔
آیاں گوں بلوچ راج ءُ مردمی ھکانی ادارھاں لوٹ کرتگ کہ پہ بھادر بشیر ءِ آجوئی ءَ مئے گون ءَ توار چست بہ کن اِت۔