تربت: کیچ دمگدار ءِ کارگس ءِ دیم ءَ برجاھیں زھرشانی نندانک ءَ بلوچ یکجھتی کمیٹی، بلوچ نودربر گل ءِ درسیں بھرگاں، تربت سول سوسائٹی، ھک بہ دئیت زرمبشت ءُ آدگہ سیاسی بھرگاں دیوانے برجم داشتگ ءُ ھمے سوڑگ کرتگ کہ زور بیگواھیں مردمانی کھولانی زرمبشت ءِ مھکم کنگ ءَسیاسی بھرگ ھواری ءَ جھد کن اَنت ءُ جھد ءَ تیز کن اَنت ءُ زور بیگواھیں مردمانی کھولانی نیمگ ءَ شنگ بوتگیں سوڑگ ءِ شریں وڑے ءَ پلہ مرزی ءَ کن ایں۔
آیاں تران کرتگ ءُ گوشتگ کہ زوریں بیگواھی سکا مزنیں جیڑھے ریاستی ادارہ ایشی ءَ کارمرز کنگ ءُ کھولانی گپاں گوش دارگ ءَ نہ اَنت۔ دو ھپتگ اِنت کہ زھرشانی نندانک برجاہ اِنت دمگدار ءَ ھوار سرکار ءِ نیمگ ءَ آیانی لوٹ منگ بوگ ءَ نہ اَنت۔
آیانی گوشگ اِنت کہ اے درگت ءَ کیچ ءِ سیاسی بھرگاں ھواری ءَ سوڑگ کرتگ کہ کھولانی زرمبشت ءَ تیوک ءَ یل نہ کن ایں آیاں شریں وڑے ءَ کمک کن ایں ءُ اے زرمبشت ءَ گیش مھکم کن ایں۔
