بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ شھید نور زمان پنام رئیس بلوچ ءِ کادربکش جھمنند ھوشاپ پرکوٹگ نومبر 2020 ءَ پہ راجی آجوئی جُھد ءَ گوں بی ایل ایپ ءَ ھمگرنچ بیتگ۔ گچک کھن ءَ یک مئی2024 ءَ شھید بیتگ۔آئی ءَ وتی بنداتی وانگ چہ سرکاری وانگجاہ ھوشاپ ءَ 2010 ءَ بندات کُرتگ ءُ 2020 ءَ نوہ تبک ءَ وانگ ءَ پد گیش ونت ئِے نہ کُرتگ۔ شھید نور زمان یک مھکم، جپاکش، نہ تُرس، جوانمرد ءُ جنگولیں ھمبلیں بیتگ کہ پہ آجوئی جُھد ءِ راھی بیتگ۔
آئی ءَ گوشتگ کہ آ جولائی 2023 ءَ پہ سلاہ چگل دیگ ءَ لاچار کنگ بیتگ، نزام پنام دیدار ءَ پاکستانی لشکر ءُ چیریں ادارھانی دیم ءَ پیش کُرتگ اَت کہ پد ءَ آئی گوں اوتاگ ءِ کماندار ءَ دُرسیں جاورانی بابت ءَ سرپد کُرتگ ءُ یکبرے پد ءَ گوں گل ءَ ھوار بیگ ءِ گْوشتگ۔آ داں بازیں ماھاں مزن ھور ءَ شُتگ بلے زورت واتر بیتگ ءُ گل ءِ دمگی اوتاگ ءِ بھر جوڑ بیتگ۔
جارکش ءَ گوشتگ کہ شھید نور زمان پنام رئیس ءِ ناکوسرمچار ممتاز پنام ملا یاسر کہ بی ایل اے ءِ گون ءَ ھمگرنچ بیتگ، آ کیچ ءِ ھند گورکوپ ءَ17جنوری 2023 ءَ شھید بیتگ۔
آئی ءَ گوشتگ کہ باجو بیتگیں سرمچار ءُ ریاست ءِ سروکی ءَ کار کنوکیں راجدروہ نبیل پنام آدل، آکب پنام باسد ءُ یاسر پنام ملنگو تچکی ءَ ھمبلیں سرمچار ءِ شھید کنگ ءَ ھوار اَنت۔ اے دُرسیں مردم نشان بیتگ اَنت ءُ زوت وتی آسر ءَ سر کنگ بنت۔بلوچ راجی زْرمبشت ءِ بگیری ءَ پرکاریں راجی دژمن ھچ وڑ ءَ پھل کنگ نہ بنت۔
جارکش ءَ گوشتگ کہ شھیدانی ھون بلوچستان ءِ آجوئی اِنت ءُ آجوئی بلوچانی نسیب ءَ اِنت چے ءَ کہ آ پہ گواچنی وتی سرڈگار ءِ دیمپانی ءَ جنگ کنگ ءَ اَنت۔سوب ءُ سوبمندی مدام راستی ءِ بیت۔
میجر گھرام ء۔ گوشتگ کہ بی ایل ایپ شھید سرمچار نور زمان ءَ پہ آئی ءِ گرانبھائیں دیمونی ءَ ستک شانی ندر کنت ءُ کول کنت کہ زوت شھیدانی منگھیں واھگ داں منزل ءَ سر کنگ بنت۔
