بلوچستان آجوئی سنگر ( بی ایل ایپ )ءَ چہ تربت ءَ پاکستانی لشکر ءِ دزگیر کرتگیں دو کارمندانی تامر چہ وتی رسانکدری تندجاہ ” آشوب” ءَ شنگ کرتگ۔
پاکستانی لشکر ءِ دزگیر کرتگیں کارمندانی نام بشیر اھمد ء منزور ءُ رازک ء میا داد اِنت کہ بی ایل ایپ ءِ سرمچاراں 10 جون 2024 ءَ چہ آپسر تربت ءَ دزگیر کرتگ اَنت ءُ رند ءَ پہ مردمگری ءُ بلوچ بوگ ءِ بنیاد ءَ یل داتگ اَنت۔
اے درگت ءَ بلوچستان آجوئی سنگر ( بی ایل ایپ)ءِ جارکش میجر گھرام ءَ وتی شنگ کرتگیں درشان ءَ گوشتگ کہ دزگیر کُرتگیں دوئیں لشکری کارمند بلوچ اَنت کہ آیاں زوگریں پاکستانی لشکر ءَ برتی بیگ ءِ سر ءَ شرمندگی درشان کُرتگ ءُ وتی ردی ءِ پھلی لوٹ اِتگ۔دوئیں لشکری کارمنداں چہ لشکر ءَ دراھگ ءِ جار جتگ ءُ پہ گزران کنگ ءَ مزوری کنگ ءُ گوں لشکر ءَ ھچ پیمیں نزیکی نہ کنگ ءِ دلجمی داتگ۔بی ایل ایپ ءَ دوئیں لشکری کارمندان ءَ یک موھے داتگ،پھل کُرتگ ءُ یل داتگ اَنت۔
آئی ءَ دیمتر ءَ گوشتگ کہ ما چہ بلوچ ورنایاں لوٹ کن ایں ایوک ءَ پہ روزگار ءَ زورگریں پاکستان ءِ رستریں لشکر ءُ آدگہ پھازداری لشکر ءَ برتی مہ بنت ءُ بلوچ راج ءِ بگیری ءَ آیانی جنگی میارباری ءُ بلوچ چُکچینی ءِ میار ءَ شریدار مہ بنت۔
تامر ءَ ھم گندگ بیت دوئیں لشکری کارمند وتی میارباری ءَ من اَنت ءُ چہ لشکر ءَ در آھگ ءِ جار ءَ جن اَنت ءُ پہ گزران کنگ ءَ دیم ءَ گوں لشکر ءَ نزیکی نہ کنگ ءِ دلجمی ءَ دے اَنت۔
