تربت: آئید ءِ روچ ءَ بندات بوتگیں زور بیگواھیں مردمانی کھولانی زھرشانی نندانک ءَ شش روچ سرجم اِنت کہ انگت ءَ برجاہ اِنت۔ چہ سرکار ءِ نیمگ ءَ پہ آیانی لوٹانی منگ ءَ ھچ وڑیں گامگیج زورگ نہ بوتگ۔
زھرشانی نندانک ءَ کماشاں ھوار کسان کسانیں زھگ بازیں کچے ءَ ساڑی اَنت۔ زھرشانی نندانک ءَ سیاسی ءُ چاگردی گلانی سروک ءُ باسک پہ ھمدردی درشان کنگ ءَ پیداک اَنت۔
زھرشانی ءَ نشتگیں مردمانی گوشگ اِنت کہ ریاست ءِ نادزرسی پھم ءَ ڈن اِنت ءُ واکدارانی بے تواری ءِ سر ءَ مارا بژن بوگ ءَ اِنت۔ کیچ ءِ دوزھیں گرمی ءَ کھول دگ ءِ سر ءَ پہ وتی آزیزانی آجوئی ءَ نشتگ اَنت ءُ رھشونی ءِ ٹاپار جنوک وتی گسانی تہ ءَ نشتگ اَنت ءُ ایرکنڈیشن ءَ یل کرت نہ کن اَنت۔ آیان ءَ پہ زھرشانی ءَ نشتگیں مردمانی ھال ءِ گرگ ءَ ھم وھد نہ رس ایت۔
یات بہ بہ اِت کہ اے کھول آئید ءَ پیش ھم دمگدار ءِکارگس ءِ دیم ءَ زھرشانی ءَ نشتگ اَنت آیاں سے روچ وھد لوٹ اِتگ ءُ زھرشانی اِش ھلاس کرتگ۔ آیانی داتگیں وھد ءِ گوزگ ءَ پد کھولاں یکبرے پد ءَ زھرشانی بندات کرتگ۔
