شال:پہ زور بیگواھیں مردمانی پدجنگ ءَ شدکشیں زھرشانی گدان ءَ 4586 روچ سرجم بوتگ۔ آدینگ ءِروچ ءَ ھزارہ ایکٹوسٹ زامن چنگیزی، مھمد کازمی ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان ءِ مردمی ھکانی لپاشگ ءِ تیز بوگ یک پدریں منانکے، ھمیشی سوب ءَ پاکستان مردمی ھکانی بگریاں ابید زھرشانی گدانانی ماندارگ ءُ ھمک روچ زویں بیگواھی ءُ ناشریں کاروائی یکشل ءَ برجاہ اَنت۔
ماما کدیر گوشتگ کہ پاکستان ءَ پہ بلوچ چکچینی ءَ میان استمانی کمک ءُ چہ میان استمانی ادارھانی بے تواری ءَ سوب کرتگ ءُ انگت ءَ ھمے جھد ءَ اِنت کہ بلوچ چکچینی ءَ وتی دست ءَ مھکم بہ کنت۔ پاکستان ءِ دو دیمی کرد دمگ ءَ ھوار سرجمیں جھان ءِ تہ ءَ مذھبی ناشرکاریاں پاکستان ءِ تچکی ءَ دست ھوار اِنت، چہ ایشی ءَ ابید پاکستان ءِ بگیری ءَ انگت ءَ ھچ وڑیں گامگیج زورگ نہ بوتگ۔
آئی ءَ گوشتگ کہ پاکستان ءَ جھان ءِ بے تواری دیستگ ءُ بلوچ چکچینی ءِ شوندات بے ترس ءَ برجاہ داشتگ۔ بلوچ جنز ءِ بگیری ءَ کشگ ءُ چگل دیگ، مچی مانشجاھاں لاشانی کل کنگ ءِ شوندات ءِ سر ءَ کار کنگ ءَ اِنت پاکستان ءَ لھتیں سالانی تہ ءَ ھزارانی کچ ءَ بلوچ پسگ آوار جتگءُ شھید کنگ ءَ پد آیانی ژانگولیں لاش چگل داتگ اَنت۔
