ھاران: گوستگیں روچاں پنجگورءَ کشگ بوتگیں ھاران ءِ جاہ منند باسد مینگل ءِ کشندھانی دزگیر نہ کنگ ءِ بگیری ءَ ھاران پریس کلب ءِ دیم ءَ زھرشانی کنگ بوتگ۔ زھرشانی ءَ کھول ءِ ھواری ءَ سول سوسائٹی ءِ سروک ءُ باسک، سیاسی ءُ چاگردی کارکن، جنین ءُ زھگاں ھوار مردماں بازیں کچے ءَ بھر زرتگ۔
زھرشانی ءَ مردماں تران کرتگ ءُ گوشتگ کہ پنجگور ءَ سلاہ بندیں مردماں لٹ ءُ پل ءِ میان ءَ تیرگواری کرتگ ءُ ھاران ءِ جاہ منند باسد مینگل کشتگ کہ آ یک نیزگار ءُ مزدورے بوتگ۔ گس ءَ پترگ ءُ مردمانی کشگ بلوچی دودمان ءِ بگیری اِنت۔
آیاں گوشتگ کہ پنجگور ءِ وڑیں بلوچ دوستیں شھرے ءَ ھاران ءِ جاہ منندیں جنینانی سر ءَ ارش کنگ پہ پنجگور ءِ لس مردماں ملامتی گپے۔ پنجگور ءِ سروک ءُ واکدار ءِ نیمگ ءَ جوانیں گامگیج نہ زورگ ءُ ٹپی ئیں جنین ءِ بندات ءَ کمک نہ کنگ پہ سرکار ءِ کارپدان یک جستے ودی کنت۔
آیاں گوشتگ کہ ابدالباسد مینگل ءِ کشندہ دزگیر کنگ ءُ آئی لوگبانک سرکار ءِ نیمگ ءَ درمان کنگ بہ بیت۔
